Sfida ndaj Interit, trajneri i Feyenoordit: Rival me përvojë, por ne i kemi shanset tona për fitore

Në prag të përballjes së madhe në Ligën e Kampionëve kundër Interit, trajneri i Feyenoordit, Giovanni van Bronckhorst, ka dalë para mediave për të ndarë pritshmëritë e tij rreth këtij dueli evropian. Gjatë konferencës për shtyp, strategu holandez analizoi stilin e lojës së zikaltërve, duke theksuar sfidat që paraqet ky kundërshtar. “Kam ndjekur disa nga ndeshjet e tyre, përfshirë edhe derbin e fundit ndaj Milanit. Është gjithmonë e vështirë të përballesh me ta, aq më tepër që praktikojnë një futboll që përafrohet me skemat tona. Pavarësisht mungesave në organikë, ata shquhen për cilësi të lartë dhe eksperiencë të madhe. Interi di të mbrohet kompakt në bllok të ulët dhe të ndërtojë kundërsulme të rrezikshme me shumë lojtarë në fazën sulmuese, duke dëshmuar se janë një skuadër e kompletuar”, u shpreh ai. Pavarësisht forcës së kundërshtarit, Van Bronckhorst mbetet optimist për shanset e ekipit të tij. “Edhe pse atyre u mungojnë disa elementë kyç, ne do të kemi mundësitë tona për të synuar triumfin, ashtu siç kemi bërë gjithmonë. Interi padyshim që do të paraqitet ndryshe nga ndeshjet e kaluara, pasi bëhet fjalë për një klub që e njeh mirë rrugën drejt suksesit dhe kalimit të turit në Champions. Megjithatë, na takon ne të luajmë zgjuar kartat tona dhe të sigurojmë një rezultat pozitiv.” Në përmbyllje të fjalës së tij, trajneri u ndal edhe te ecuria e deritanishme e skuadrës: “Kemi vuajtur në ndeshjet në transfertë, por arritëm një fitore të rëndësishme në shtëpi kundër Comos, dhe shpresojmë shumë ta përsërisim atë paraqitje të mirë.”