Buxheti i vitit 2027: Për herë të parë investimet kapitale kalojnë shifrën e 1 miliard eurove

Ministri i Financave, Hekuran Murati, ka bërë të ditur se për vitin e ardhshëm investimet kapitale do të kapin vlerën e një miliard e shtatëdhjetë milionë eurove. Këto deklarata ai i dha gjatë mbledhjes së Qeverisë së Kosovës, ku u mor drita jeshile për projektbuxhetin e vitit 2027, vlera e të cilit përcaktohet në 4.27 miliardë euro, ndërsa 908 milionë euro janë parashikuar vetëm për nivelin lokal. Gjatë fjalës së tij, ministri Murati nënvizoi se ky zgjerim i investimeve kapitale përfaqëson një ngritje prej 7.2 për qind të Bruto Produktit Vendor. “Investimet kapitale për herë të parë do të shënojnë rritje mbi 1 miliardë euro në buxhet, konkretisht 1 miliardë e 70 milionë euro që përbën një rritje prej 7.2 për qind apo 8 për qind e bruto produktit vendor”, u shpreh ai. Sipas Muratit, fokusi kryesor i ekzekutivit për këtë buxhet është drejtuar nga fusha e sigurisë, shëndetësisë, infrastrukturës dhe mbështetja e mjedisit të biznesit. Po ashtu, ai shtoi se deficiti buxhetor për periudhën e ardhshme llogaritet të jetë 622 milionë euro, duke respektuar kështu parametrat e përcaktuar të rregullës fiskale. “Në përgjithësi, përveç aktiviteteve të rregullta, prioritet në buxhetim ishin sektorët në mbrojtjen e sigurisë, shëndetësisë, infrastrukturës por edhe klimës së të bërit biznes. Sa i përket deficitit buxhetor për vitin 2027, pritet të jetë 622 milionë euro në përputhje me rregullën fiskale”, sqaroi ministri. Buxheti i ri për vitin 2027 shënon një rritje prej 200 milionë eurosh krahasuar me buxhetin e rishikuar të vitit paraprak dhe 300 milionë euro më shumë se ai bazë për vitin 2026. Përveç 908 milionë eurove që shkojnë direkt për komunat, është paralajmëruar edhe ngritje e shtesave për fëmijë për 25 për qind, ndërsa BPV-ja parashikohet të arrijë në 13.4 miliardë euro. Pas miratimit nga Qeveria, ky projektligj do t'i dërgohet Kuvendit të Kosovës për procedurat e mëtejshme të shqyrtimit dhe votimit.