Tragjedia në Gjilan, mbrojtja e të dyshuarit: B. Demiri mohon çdo përfshirje në krim

Granit Syla, avokati mbrojtës i B. Demirit, ka bërë të ditur se i mbrojturi i tij ka mohuar kategorikisht kryerjen e veprës penale për të cilën po hetohet, lidhur me ngjarjen tragjike ku djali dhe mbesa e tij u gjetën pa shenja jete të dielën në Gjilan. Syla konfirmoi se ka marrë pjesë në seancën dëgjimore për caktimin e masës së sigurisë, e cila u thirr pasi Prokuroria Themelore në Gjilan i paraqiti gjykatës kërkesën zyrtare për paraburgimin e Demirit. Gjatë seancës, i dyshuari ka deklaruar para autoriteteve se nuk ka gisht në këtë ngjarje të rëndë dhe se nuk është autori i krimit që i vihet në barrë. Sipas avokatit, deri në atë fazë të procedurës, mbrojtja ende nuk e kishte pranuar vendimin zyrtar të gjykatës lidhur me kërkesën e prokurorisë për paraburgim. Mbrojtja ka paralajmëruar se sapo të vihet në dispozicion dokumentacioni i gjykatës, do të bëhet analizimi i tij për të përcaktuar hapat e ardhshëm ligjorë, konform rregullave të Kodit të Procedurës Penale. "Për detaje të tjera, duke qenë se rasti është në fazën e hetimeve, varësisht nga rrjedha e procedurës mund të deklarohemi", ka shtuar tutje avokati Syla. Kujtojmë se ngjarja tronditëse ndodhi më 1 nëntor në fshatin Demiraj të Gjilanit, ku humbën jetën tragjikisht një 27-vjeçar dhe vajza e jo tre muajshe, të cilët u gjetën pa shenja jete. Autoritetet kompetente po zhvillojnë hetime intensive nën dyshimin e bazuar për veprën penale të vrasjes së rëndë.