Nata e Halloween-it në Tiranë: QSUT hedh poshtë shifrat alarmante për qindra të rinj të intoksikuar

Shërbimi i Toksikologjisë pranë Qendrës Spitalore Universitare “Nënë Tereza” (QSUT) ka përgënjeshtruar zërat dhe lajmet e qarkulluara se gjatë natës së të shtunës janë paraqitur rreth 300 pacientë për ndihmë mjekësore, si pasojë e konsumit të substancave narkotike apo të hedhjes së tyre të fshehtë në pijet e qytetarëve gjatë festimeve të Halloween-it. Sipas bluzave të bardha, ngjarja nuk ka përmasat e alarmit të ngritur në rrjet, ndërkohë që në fokus të shqetësimit mbetet e ashtuquajtura “Rapi Drug”, një lëndë narkotike e rrezikshme që shkakton humbje të menjëhershme të vetëdijes. Përdorimi i kësaj substance e lë viktimën totalisht të pafuqishme dhe të pambrojtur ndaj abuzimeve të mundshme seksuale, ndërsa karakterizohet nga amnezi e plotë e ngjarjeve të ditës së kaluar. Në lidhje me këtë situatë, shefi i Shërbimit të Toksikologjisë, Andrin Tahiri, ka përcjellë një apel të fortë për brezin e ri, duke u ndalur te rëndësia e vigjilencës, por duke folur edhe në cilësinë e prindit. “Dëfrehuni me njerëz të besuar dhe bëni kujdes me pijet e hapura. Më mirë porosit një tjetër nëse u largove për pak nga tavolina. Dil me njerëz të besuar”, u shpreh Tahiri në deklaratën e tij. Në përmbyllje të apelit, ekspertët e shëndetësisë u bëjnë thirrje qytetarëve që të shmangin çdo lloj abuzimi me substancat narkotike dhe të mos guxojnë kurrë të bëjnë përzierje të tyre me alkoolin, pasi pasojat për shëndetin mund të rezultojnë fatale dhe të pakthyeshme.