Solskjaer shpreh ambicien për një rikthim në «Old Trafford»: Kam ende punë të pambyllura me Manchester United

Ish-trajneri i njohur, Ole Gunnar Solskjaer, nuk e ka fshehur dëshirën e tij për të marrë sërish drejtimin e Manchester Unitedit, duke pranuar hapur se lidhja e tij me gjigantin anglez mbetet e papërfunduar. Gjatë një prononcimi për televizionin norvegjez TV 2, strategu foli pa doreza për eksperiencën e tij të kaluar në krye të "Djajve të Kuq" dhe mundësinë e një rikthimi të mundshëm në të ardhmen. «Ende ndiej se kam diçka të pazgjidhur. Sigurisht, do të kishte qenë bukur ta kisha edhe një herë atë mundësi», u shpreh Solskjaer gjatë intervistës. Tekniku nga Norvegjia konfirmoi se kishte zhvilluar biseda me zyrtarët e klubit, Jason Wilcox dhe Omar Berrada, në periudhën kur drejtuesit po shqyrtonin alternativat për stolin. Megjithatë, ai sqaroi se bisedimet nuk kishin kaluar në fazën e negociatave apo të ofertave konkrete për kontratë. Pavarësisht aspiratave personale për t'u rikthyer në skenë, Solskjaer nuk i kurseu elozhet dhe mbështetjen e plotë për Michael Carrick, të cilin e konsideron profilin ideal për ta udhëhequr skuadrën drejt suksesit. «Michael i ka të gjitha mundësitë për ta çuar atë klub përpara. Mendoj se është njeriu i duhur. Ai e kupton klubin, i kupton tifozët dhe e di se çfarë kërkohet», u shpreh norvegjezi. Në vijim të fjalës së tij, ai shtoi se do të ishte i gatshëm të përgjigjej pozitivisht edhe për një angazhim afatshkurtër, nëse rrethanat do ta kërkonin një gjë të tillë. «Nëse Michael bën punë të mirë për dhjetë vjet dhe vendos të largohet, e nëse më kërkojnë që ta drejtoj ekipin për dy muaj, sigurisht që nuk do të thosha jo. Kam kaluar 18-19 vjet në atë klub, është pjesë e familjes sime. Por nuk është diçka për të cilën po mendoj aktualisht», përfundoi Solskjaer. Kujtojmë se Solskjaer ka qenë në krye të Manchester Unitedit nga viti 2018 deri në nëntor të vitit 2021, ndërsa deklaratat e fundit dëshmojnë se ndjenjat e tij për këtë skuadër mbeten të pandryshuara, pavarësisht mbështetjes aktuale për drejtimin që ka marrë klubi.