Vlora Çitaku pas miratimit të Deklaratës për UÇK-së: Hapi i radhës i takon Qeverisë

Nënkryetarja e Partisë Demokratike të Kosovës, Vlora Çitaku, ka dalë me një reagim zyrtar pasi Kuvendi miratoi në mënyrë unanime Deklaratën në mbrojtje të Ushtrisë Çlirimtare të Kosovës dhe ish-krerëve të saj. Nëpërmjet një postimi në rrjetet sociale, Çitaku u ka shprehur mirënjohjen e saj 99 deputetëve që i dhanë mbështetjen këtij dokumenti, duke theksuar se tashmë topi është në fushën e ekzekutivit për të proceduar tutje me nismën ligjore. “Kuvendi sot e shprehu vullnetin e tij. Tani është radha që Qeveria ta sjellë në Kuvend Projektligjin për ndryshimin dhe plotësimin e Ligjit për Dhomat e Specializuara, që ai të votohet pa vonesë,” ka theksuar ajo. Tutje, zyrtarja e lartë e PDK-së ka shtuar se deklaratat politike duhet të shoqërohen me hapa konkretë institucionalë. “Deklarata është zotim. Ligji është veprim. T’i jetësojmë të dyjat pa vonesa. Sot u pa që është e mundur. UÇK-ja të na bashkojë,” ka përfunduar shkrimin e saj Çitaku.