Lamtumirë bashkëthemeluesit të UÇK-së, Ali Mejzinolli: Veprimtari që shtëpinë e ktheu në spital ushtarak dhe strehë lirie

Ka ndërruar jetë veterani i Ushtrisë Çlirimtare të Kosovës dhe një ndër figurat e shquara të lëvizjes kombëtare, Ali Shyqeri Mejzinolli, me origjinë nga fshati Shalë i Lipjanit. I ndjeri ka qenë ndër organizatorët e parë të protestave kundër aparatit shtetëror serb, duke e shtrirë më pas aktivitetin e tij atdhetar në strukturat ilegale, për t'u bërë më vonë ndër themeluesit e parë të radhëve të UÇK-së. Në kohën e luftës, banesa e familjes Mejzinolli në Shalë të Lipjanit u vu në shërbim të kauzës kombëtare, duke shërbyer fillimisht për veprimtarinë e shoqatës humanitare “Nënë Tereza” e më pas duke u shndërruar në një spital ushtarak ku merrnin ndihmën e parë luftëtarët e plagosur të lirisë. Po ashtu, kjo pronë ka qenë vatra ku funksionoi shtabi ushtarak i zonës së Shalës, vend ku u pritën delegacione të ndryshme ndërkombëtare dhe prej nga u nis delegacioni zyrtar i UÇK-së drejt Konferencës historike të Rambujesë. Ceremonia e varrimit të Ali Mejzinollit do të zhvillohet në varrezat e fshatit Shalë të Lipjanit, duke nisur nga ora 15:30.