Përplasja e mesazheve mes partive qeveritare pas epilogut zgjedhor në Bërvenicë

Rezultati i zgjedhjeve lokale në Bërvenicë, ku triumfoi Arkin Jahiji, kandidat i BDI-së, ka sjellë reagime dhe qëndrime të ndryshme nga partnerët e koalicionit qeveritar, OBRM-PDUKM dhe VLEN. Ndërsa OBRM-PDUKM ka hedhur akuza se VLEN-i ka ndihmuar fitoren e BDI-së duke dështuar të shkëputet nga nacionalizmi etnik, nga ana e saj VLEN thekson se procesi evidentoi nevojën për angazhim shtesë drejt një modeli të mirëfilltë qytetar në vend. Nëpërmjet një komunikate për media, OBRM-PDUKM theksoi se hyri në këtë garë me projekte konkrete për zhvillimin e komunës, ndërkohë që akuzoi rivalët politikë për shndërrimin e fushatës në një arenë ndarjesh etnike. "Një Bërvenicë për të gjithë është më shumë se një koncept në të cilin theksuam forcën e unitetit, bashkëjetesës dhe respektit të ndërsjellë, investimeve në infrastrukturë dhe kushteve më të mira të jetesës, ndërsa kundërshtarët, duke përfituar nga situata demografike, bënë thirrje për votim etnik", theksuan nga kjo parti. Sipas OBRM-PDUKM-së, BDI, LSDM, “E Majta” dhe VLEN bashkuan forcat kundër saj, duke e degraduar garën zgjedhore në një rreth përçarjesh në vend të një ballafaqimi idesh. "Ajo që është veçanërisht për t'u ardhur keq është se partneri ynë i koalicionit, VLEN, humbi mundësinë në Bërvenicë për të qenë ndryshe nga BDI dhe për t'u ngritur mbi nacionalizmin etnik, gjë që tregoi se, ashtu si kandidatët e LSDM-së dhe 'Të Majtës', ishte një kalë troje në favor të BDI-së", thuhet në deklaratë. Në krahun tjetër, VLEN argumentoi se zgjedhjet në këtë komunë u zhvilluan në një mjedis të lirë, demokratik dhe pa incidente apo shkelje të rregullave, duke nënvizuar se vota i takon ekskluzivisht qytetarëve dhe nuk mund të trajtohet si pronë e partive. "Në një demokraci, vullneti i qytetarëve është dhe duhet të mbetet mbi çdo interes, dhe në demokracinë lokale, vullneti i qytetarëve duhet të jetë mbi vijat partiake. Votat u përkasin qytetarëve, të cilët vendosin lirisht se kujt do t'i besojnë", deklaruan nga VLEN. Po ashtu, kjo aleancë kritikoi qasjen e përdorur gjatë fushatës, duke vlerësuar se thirrjet për baza etnike nuk i shërbejnë konsolidimit të shoqërisë qytetare. "Një model qytetar nuk mund të ndërtohet duke bërë thirrje për votim etnik së bashku me LSDM-së dhe 'Të Majtën'. Aty ku është 'E Majta', nuk ka shqiptarë. Në shoqëritë me diversitet etnik, çdo veprim provokon një reagim. Një qasje e tillë rrezikon të krijojë një rreth vicioz nxitjeje dhe retorike polarizuese, si dhe të thellojë përçarjet etnike. Në vend të përparimit, do të kemi regres", shtuan nga VLEN. Në raundin e dytë të zgjedhjeve në Bërvenicë, kujtojmë se kandidati i BDI-së, Arkin Jahiji, fitoi 4.442 vota, ndërsa kundërshtari i tij nga OBRM-PDUKM, Stojanço Radiçevski, siguroi 4.177 vota.