Krizë e rëndë politike në Belgjikë: Kryeministri Bart De Wever dorëzon dorëheqjen te Mbreti Philippe

Kryeministri i Belgjikës, Bart De Wever, i ka dorëzuar zyrtarisht dorëheqjen e tij Mbretit Philippe, pasi palët nuk kanë arritur të gjejnë një gjuhë të përbashkët. Ndërkohë, kreu i shtetit mbretëror ende nuk ka marrë një vendim përfundimtar mbi pranimin ose refuzimin e saj, sipas njoftimit zyrtar nga pallati mbretëror. Pas zhvillimeve të mëngjesit të kësaj të hëne, Pallati Mbretëror bëri të ditur se monarku ka vendosur ta shtyjë vendimin e tij. Ndërkaq, ditën e nesërme do të nisë cikli i konsultimeve me krerët e subjekteve politike që përbëjnë koalicionin qeverisës, ndërsa të premten kryeministri pritet të ketë një tjetër takim kokë më kokë me mbretin. Ky hap drastik nga ana e kreut të ekzekutivit erdhi si pasojë e bllokimit të plotë institucional, pas bisedimeve intensive gjatë gjithë natës mes partnerëve të koalicionit rreth projektbuxhetit. Kjo ngërç i madh qeveritar e detyroi Mbretin Philippe të ndërpresë pushimet e tij dhe të kthehet urgjentisht në Bruksel. Në themel të kësaj krize të thellë qeveritare qëndron mosmarrëveshja mes pesë partnerëve të koalicionit, të cilët nuk arritën dot të harmonizonin qëndrimet për një paketë të rëndësishme masash fiskale me vlerë 10 miliardë euro.