Mbyllja e “Tetorit Rozë”: Qeveria synon kulturë të vazhdueshme të kujdesit shëndetësor dhe zbulim të hershëm të kancerit të gjirit

Me hyrjen në muajin nëntor, Qeveria e Kosovës ka përmbyllur zyrtarisht fushatën ndërgjegjësuese të njohur si “Tetori Rozë”, e cila i kushtohet luftës kundër kancerit të gjirit. Në tryezën e organizuar me titull “Përtej Tetorit Rozë”, krerët e shtetit dhe zyrtarët shëndetësorë kanë theksuar rëndësinë e kalimit të këtij angazhimi në një kulturë të përditshme të kujdesit ndaj shëndetit. Kryeministri i vendit, Albin Kurti, gjatë fjalës së tij ka shprehur besimin se shoqëria kosovare po ecën përpara në ngritjen e vetëdijes për kontrollin e rregullt shëndetësor. Ai vuri në pah se institucionet kanë marrë hapa konkretë, duke mundësuar që shërbimet e mamografisë dhe ato të rikonstruktimit të gjirit të ofrohen plotësisht falas për qytetaret. “Përveç mesazhit ndërgjegjësues të ‘Përtej Tetorit Rozë’, bashkërisht synojmë nxitjen e një kulture të kujdesit të vazhdueshëm për shëndetin publik, për shëndetin e secilit, si dhe inkurajimin e njëri-tjetrit që të mos e shtyjmë kontrollin... Detyra jonë është të shkurtojmë distancën mes shqetësimit dhe kontrollit, mes diagnozës dhe trajtimit, mes gruas që kërkon ndihmë dhe institucionit që i përgjigjet asaj. Kjo punë nis me ndërgjegjësimin, përmes fushatave që organizojnë Ministria e Shëndetësisë dhe Instituti Kombëtar i Shëndetësisë Publike, si dhe përmes punës së organizatave dhe ndërmarrjeve publike e private… Në këtë drejtim, mamografia tashmë ofrohet falas gjatë gjithë vitit. Gjatë tetorit, mamografi mobil udhëton nëpër qytetet e Kosovës për ta sjellë këtë shërbim edhe më afër grave. Për pacientet që kanë nevojë për trajtim në Onkologji, janë përmirësuar edhe kushtet dhe janë instaluar aparatura të teknologjisë së fundit. Gjithashtu, ofrohet rikonstruktimi i gjirit falas dhe pa pritje”, deklaroi Kurti gjatë tryezës. Në anën tjetër, ministri i Shëndetësisë, Arben Vitia, bëri të ditur se mbi 50 për qind e rasteve të këtij lloji të kancerit janë zbuluar në faza fillestare, ndërsa shprehu ambicjen që kjo shifër të rritet edhe më tej në të ardhmen e afërt. “Tanimë kemi planin e veprimit për screening-un e kancerit të gjirit, i cili ka filluar të implementohet dhe, siç e kemi cekur disa herë gjatë kësaj fushate, vitin e kaluar 53.4 për qind e grave janë diagnostikuar në stadin e parë dhe të dytë të kancerit të gjirit. Sipas informacioneve të institucioneve shëndetësore, deri më tani kjo përqindje pritet të jetë edhe më e lartë në vitin që po përmbyllim. Synimi ynë është që kjo përqindje të rritet akoma, sepse zbulimi i hershëm është mënyra më e mirë, më pak problematike dhe më e lirë për ta mposhtur sëmundjen. Kjo nënkupton ofrimin e mundësive për diagnostikim në të gjithë territorin e Kosovës, me pajisje dhe mundësi për secilën paciente. Natyrisht, vetëkontrolli dhe lajmërimi i hershëm te mjeku janë çelësi i suksesit dhe i diagnostikimit të hershëm”, theksoi Vitia. Ministri Vitia nuk la pa falënderuar mediat për pasqyrimin e gjerë të aktiviteteve, duke mundësuar që thirrjet për kujdes të arrijnë në çdo vatër familjare në mbarë vendin. Ai e cilësoi si jetik bashkëpunimin ndërinstitucional dhe shoqëror, duke përmendur kontributin e nivelit komunal përmes drejtorëve të shëndetësisë, Bujar Gashit nga Prishtina dhe Albana Gashit nga Fushë Kosova, si dhe angazhimin e Shoqatës Jeta Vita të udhëhequr nga Nafije Latifi, krahas aktorëve të tjerë të përfshirë. Në kuadër të kësaj sensibilizimi gjatë tetorit, thirrje të ngjashme për kujdes të shtuar dhe kontrolle të rregullta mjekësore me qëllim të parandalimit dhe zbulimit të hershëm pati drejtuar edhe kryetarja e Kuvendit të Kosovës, Albulena Haxhiu.