Kthesë drastike e motit: Ja kur termometri zbret nën zero dhe kur rikthehen kthjellimet

Përfaqësuesit e motit nisin javën me kushte të paqëndrueshme atmosferike, ku mbizotërojnë vranësirat dhe reshjet e shiut, ndërkohë që temperaturat gjatë ditës së sotme do të shënojnë rritje duke kapur vlerën deri në 23 gradë celsius. Sipas meteorologes Tanja Porja, reshjet do të përqendrohen kryesisht në jug dhe jugperëndim gjatë pjesës së parë të ditës, ndërsa duke nisur nga pasditja dhe përgjatë natës, ato do të përfshijnë pjesën më të madhe të territorit të vendit. Ekspertja e meteorologjisë paralajmëron se duke filluar nga dita e martë do të ketë një kthesë të situatës klimatike, e cila do të shoqërohet me intervale më të gjata me diell, por edhe me një rënie të ndjeshme të vlerave termike në të gjithë vendin. Në zonat e thella malore, gjatë ditëve në vijim, termometri pritet të zbresë deri në zero dhe nën zero gradë celsius. “Java fillon me reshje dhe relativisht ngrohtë. Më pas në mesjavë dhe në vijim disa ditë me diell dhe ftohtë, pasi termometri do të zbresë në vlera zero dhe lehtësisht negative”, u shpreh ajo, duke shpjeguar se qarkullimi i masave ajrore nga jugu dhe juglindja ka ndikuar në rritjen e temperaturave gjatë ditës së sotme. Mëngjesi i sotëm ka regjistruar rreth 3 gradë në zonat e thella malore, ndërsa në vijën bregdetare temperaturat kanë luhatur mes 10 dhe 12 gradë. Vlerat maksimale pritet të ngjiten deri në 23 gradë celsius, me reshje që do të jenë prezente në pjesën e parë të ditës kryesisht në jug, më pak në qendër dhe të papërfillshme në veri. Për sa i përket orëve në vijim, situata do të pësojë zhvillime të tjera. “Në pjesën e dytë të ditës kemi fillimisht rrebeshe të shkurtra në jug dhe më pas gradualisht në mbrëmje gjatë natës dhe në fakt dhe ditën e nesërme do të kemi reshje në të gjithë territorin shqiptar”, theksoi meteorologia Porja.