Nga “fisi është për dasma” te praktikat e reja: Si ndryshoi qasja e pushtetit ndaj punësimeve familjare

Për vite me radhë, nepotizmi dhe punësimi i të afërmve në aparatin shtetëror kanë qenë në shënjestër të kritikave të ashpra nga Lëvizja Vetëvendosje gjatë periudhës së saj në opozitë, duke u shndërruar në një nga temat kyçe të diskutimit publik. Gjatë fushatës zgjedhore të shkurtit të vitit 2021, në një paraqitje të përbashkët publike me Vjosa Osmanin, kryeministri Albin Kurti kishte theksuar se institucionet shtetërore nuk duhet të trajtohen si hapësira për rekrutimin e familjarëve. “Është e rëndësishme që përfaqësimin e Kosovës ta kenë njerëzit më të ndershëm dhe më të dijshëm. Nuk mundemi me i mbushë ambasadat, sikurse nuk mundemi me i mbushë as ministritë me kushëri. Kushërinjtë janë për shtëpi. Fisi është për dasmë, për gazmend privat. S’ka dasma nëpër ministri”, kishte deklaruar Kurti në atë kohë. Në të njëjtën linjë, gjatë ushtrimit të detyrës si ministre e Punëve të Jashtme dhe Diasporës, Donika Gërvalla kishte ndërmarrë një hap formal përmes nënshkrimit të vendimit me numër 113/2024, i cili vendoste ndalesë zyrtare për punësimin e familjarëve të afërt të zyrtarëve dhe diplomatëve të këtij dikasteri. Me atë rast, Gërvalla kishte theksuar se procesi i rekrutimit në MPJD dhe përzgjedhja e diplomatëve të rinj duhet të zhvillohet ekskluzivisht përmes konkurseve publike, duke u mbështetur fuqimisht mbi parimin e meritokracisë dhe kritereve të mirëfillta profesionale.