Thirrje drejtuar Gërvallës: Deputeti Tahiri kërkon procedimin e ndryshimeve ligjore për Dhomat e Specializuara

Deputeti i Partisë Demokratike të Kosovës, Arian Tahiri, i ka bërë thirrje publike ministres së Drejtësisë, Donika Gërvalla, që të ndërmarrë hapa konkretë për sjelljen në Kuvend të ndryshimeve në Ligjin për Dhomat e Specializuara. Nëpërmjet një reagimi në profilin e tij zyrtar në rrjetet sociale, Tahiri ka kujtuar se ekziston një vullnet i qartë politik nga 99 deputetë të legjislativit, të cilët janë rreshtuar në mbrojtje të Ushtrisë Çlirimtare të Kosovës dhe vlerave të luftës. “Donikë, sille ligjin! 99 deputetë shprehën vullnetin për ta mbrojtur UÇK-në dhe dinjitetin e luftës sonë çlirimtare. UÇK-ja është e të gjithëve”, ka theksuar Tahiri, duke insistuar se kjo çështje është e një rëndësie të veçantë për ruajtjen e integritetit të historisë së re të Kosovës.