Tragjedi pranë një shkolle në Illinois: Një i vdekur dhe një i plagosur nga të shtënat me armë

Një ngjarje e rëndë ka tronditur shtetin amerikan të Illinois-it mbrëmjen e së dielës, ku të shtënat me armë zjarri në afërsi të fushës së futbollit të shkollës së mesme “Madison” i kanë marrë jetën një personi dhe kanë lënë të plagosur të paktën një tjetër. Incidenti shkaktoi alarm të menjëhershëm te autoritetet dhe banorët vendas, ndërsa personat e dyshuar për krimin arritën të largoheshin nga vendngjarja dhe ndodhen ende në arrati. Në zonë janë dislocuar forca të shumta policore, të cilat kanë nisur një operacion të gjerë për identifikimin dhe arrestimin e tyre. Sipas informacioneve nga shërbimet e emergjencës, telefonatat e para për të shtëna pranë kompleksit shkollor u regjistruan me shpejtësi. Të dhënat audio nga qendra e dispeçerisë konfirmojnë se ekipet e shpëtimit gjetën dy persona të plagosur në terren, prej të cilëve njëri kishte pësuar dëmtime të rënda në fytyrë dhe ndodhej në gjendje kritike për shkak të humbjes së madhe të gjakut. Ekipet mjekësore reaguan pa vonesë duke i dhënë ndihmën e parë viktimave, mirëpo përkundër përpjekjeve intensive, njëri nga të lënduarit nuk arriti t’u mbijetonte plagëve të rënda. Fill pas ngjarjes, njësi të shumta të zbatimit të ligjit rrethuan me shpejtësi hapësirën pranë fushës së futbollit, duke siguruar perimetrin për mbledhjen e provave materiale. Në këtë aksion janë përfshirë disa departamente policore, ku bën pjesë edhe Zyra e Sherifit të Qarkut Madison. Hetuesit dhe forcat e rendit po vijojnë kontrollet e rrepta në terren për kapjen e autorëve, të cilët mendohet se janë larguar me të shpejtë në këmbë nga skena e krimit.