Tragjedia familjare që tronditi Gjilanin: Detajet e reja për vdekjen e 27-vjeçarit dhe foshnjës 3-muajshe në Demiraj

Një ngjarje e rëndë ka tronditur thellësisht opinionin publik në rajonin e Gjilanit, ku si pasojë e një tragjedie në fshatin Demiraj kanë mbetur të pajetë një 27-vjeçar dhe një foshnjë tre muajshe. Sipas të dhënave zyrtare, Policia e Kosovës është njoftuar për ngjarjen më 1 nëntor, rreth orës 08:47, pasi në një banesë private në këtë fshat u gjetën trupat pa shenja jete të dy viktimave. Në vendin e ngjarjes kanë zbarkuar menjëhirë policia, prokurori i rastit dhe ekipi i ndihmës së shpejtë mjekësore, të cilët kanë konfirmuar zyrtarisht vdekjen e të riut dhe foshnjës. Në kuadër të veprimeve të para hetimore, forcat e rendit kanë arrestuar një 65-vjeçar, i cili është babai i 27-vjeçarit të ndërruar jetë, nën dyshimin e bazuar për kryerjen e vrasjes së dyfishtë. Me vendim të prokurorit të shtetit, i dyshuari është dërguar në mbajtje për 48 orë, ndërsa rasti po trajtohet si “Vrasje e rëndë”. Rrethanat specifike që çuan në këtë ngjarje mbeten ende të pasqaruara plotësisht. Trupat e pajetë janë transferuar në Institutin e Mjekësisë Ligjore për obduksion, gjersa hetuesit po punojnë për zbardhjen e të gjitha detajeve. Ngjarja ka nxitur reagime të shumta institucionale. Kryetari i Komunës së Gjilanit, Alban Hyseni, ka shprehur ngushëllimet më të sinqerta për familjen e goditur, duke e cilësuar humbjen e dy jetëve si një goditje të rëndë për të gjithë komunitetin. “Humbja e jetëve në rrethana që ende nuk janë sqaruar në tërësi është një tragjedi që na prek secilin”, ka deklaruar Hyseni, duke kërkuar veprime të shpejta nga organet ligjzbatuese: “Presim që organet e rendit dhe të drejtësisë që të bëjnë punën e tyre me përkushtim të plotë për zbardhjen e të gjitha rrethanave të këtij rasti”. Lidhur me këtë tragjedi ka reaguar edhe ministrja e Drejtësisë, Donika Gërvalla, e cila vuri theksin te rëndësia e sigurisë dhe mbrojtjes brenda familjes. “Familja duhet të jetë streha më e sigurt e njeriut, vendi ku mbizotërojnë dashuria, harmonia, kujdesi dhe mbrojtja”, ka nënvizuar Gërvalla, duke kërkuar hetim të menjëhershëm: “Në këto momente, është e domosdoshme që rrethanat e këtij rasti të hetohen plotësisht dhe pa vonesa, në mënyrë që e vërteta të zbardhet dhe institucionet përgjegjëse të ndërmarrin veprimet që kërkon ligji”. Autoritetet e rendit dhe drejtësisë po vazhdojnë punën intensive për ndriçimin e plotë të të gjitha rrethanave të kësaj tragjedie të rëndë.