Ahmeti pas fitores në Bërvenicë: Maqedonia u përket shqiptarëve autoktonë, ne jemi faktor shtetformues

Kryetari i Bashkimit Demokratik për Integrim (BDI), Ali Ahmeti, ka marrë pjesë në tubimin e mbajtur në Bërvenicë pas arritjes së fitores nga kandidati Arkin Jahiji. Gjatë fjalës së tij, ai vuri në dukje se kjo komunë ka një popullsi me shumicë shqiptare, ndaj është plotësisht me vend që ajo të drejtohet nga një kryetar shqiptar. Në adresimin e tij para të pranishmëve, kreu i BDI-së vlerësoi rëndësinë e këtij rezultati zgjedhor: “Sonte e gjithë vëmendja e shqiptarëve është e përqendruar këtu, sepse Bërvenica është një komunë me 65% shqiptarë dhe u takon të ketë kryetar shqiptar. U jam mirënjohës të gjithë atyre që sot zgjodhën të ardhmen e komunës. Arkini sot është përfaqësues i të gjithë qytetarëve pa dallim”. Ahmeti po ashtu kritikoi ashpër retorikën e përdorur nga disa qarqe politike maqedonase përgjatë garës: “Nuk kanë vepruar drejt disa politikanë maqedonas që e etiketuan përfaqësuesin tonë si kriminel. Deklaratat e ngutshme nuk i shërbejnë bashkëjetesës, pasi ne si drejtues partish nuk mund të marrim rolin e prokurorit. Uroj që gabime të tilla të mos përsëriten më, por t’i përkushtohemi afërsisë dhe komunikimit”. Lidhur me statusin e shqiptarëve dhe vendit, ai dha një mesazh të prerë politik: “Maqedonia nuk është as e Hristijan Mickoskit e as e Branko Cërvenkovskit, por u përket shqiptarëve autoktonë që kurrë nuk i kanë rënë në qafë askujt, ndonëse të tjerët na kanë rënë në qafë neve. Ne jemi shtetformues dhe i dalim zot këtij vendi. Duhet të na mbështesin në këtë qëndrim tonin aq të qartë, për të gjithë ata që mund të kenë ende dilema. Ne marrim përgjegjësinë për t'i çuar proceset përpara në vendin që na takon”, përmbylli fjalën e tij Ahmeti.