Parashikimi i motit: E hëna sjell paqëndrueshmëri, reshje shiu dhe shtrëngata në territorin shqiptar

Këtë të hënë, territori i Shqipërisë do të përfshihet nga kushte atmosferike të paqëndrueshme, të cilat do të sjellin ndryshime të dukshme në pamjen e motit gjatë gjithë ditës. Sipas parashikimeve metereologjike, dita do të nisë me kthjellime dhe vranësira kalimtare, të cilat do të vijnë duke u trashur, duke u shndërruar në vranësira mesatare deri të dendura duke filluar nga orët e mesditës. Reshjet e shiut pritet të bëhen të pranishme pas mesditës. Ato do të kenë fillimisht intensitet të ulët në jug të vendit, për t'u shtrirë gradualisht në të gjithë territorin. Në zonën jugore dhe pjesërisht në atë qendrore, shirat parashikohet të shoqërohen me shtrëngata afatshkurtra dhe shkarkesa elektrike. Gjithashtu, qytetarët duhet të bëjnë kujdes në orët e para të mëngjesit dhe gjatë kohës së reshjeve, pasi parashikohet prani e mjegullës së dendur dhe mjegullinës, të cilat do të kufizojnë dukshmërinë në rrugë. Sa i përket erës, ajo do të fryjë nga drejtimi i verilindjes dhe juglindjes me një shpejtësi mesatare prej 9 metrash në sekondë. Megjithatë, përgjatë vijës bregdetare dhe në zonat luginore, era do të fitojë fuqi, duke arritur shpejtësi deri në 19 metra në sekondë, ndërsa në det intensiteti i valëzimit do të lëvizë nga 3 deri në 5 ballë.