Moti gjatë javës në Kosovë: Reshje shiu, borë në male dhe rënie e temperaturave

Kosovën e pret një javë me ndryshime të dukshme atmosferike, ku do të mbizotërojë moti kryesisht i vranët, i shoqëruar me reshje të kohëpaskohshme shiu dhe ulje të temperaturave. Në zonat e larta malore pritet të shfaqen edhe reshjet e para të borës. Sipas parashikimeve nga Instituti Hidrometeorologjik i Kosovës, vlerat maksimale të temperaturave përgjatë ditëve në vijim do të luhaten mes 5 dhe 11 gradë Celsius. E hëna starton me qiell të mbuluar nga re të dendura, ndërsa në zona të caktuara mund të ketë edhe reshje lokale shiu. Termometri do të shënojë minimale nga 1 deri në 4 gradë Celsius, ndërsa maksimalet e ditës do të arrijnë nga 5 deri në 11 gradë. Dita e martë do të vijojë me mot të vranët dhe reshje shiu të cilat do të përfshijnë pjesë të ndryshme të territorit. Në brezin malor parashikohen reshje të përziera shiu dhe bore. Minimalet do të zbresin në 0 deri 3 gradë, kurse ato maksimale do të lëvizin ndërmjet 6 dhe 8 gradë Celsius. Të mërkurën do të mbajë mot me vranësira të theksuara, ku në lokalitete të caktuara do të ketë reshje të lehta shiu. Minimalet do të lëvizin nga 1 deri në 3 gradë Celsius, ndërsa maksimalet do të luhaten nga 5 deri në 9 gradë. E enjtja do të vijojë me të njëjtën tablo meteorologjike, ku do të mbizotërojë moti i vranët dhe me temperatura relativisht të ulëta. Vlerat minimale do të jenë nga 0 deri në 3 gradë Celsius, ndërsa ato maksimale do të arrijnë nga 5 deri në 8 gradë. Në ditën e fundit të javës punuese, përveç vranësirave, qytetarët do të mund të shijojnë edhe disa intervale me diell. Temperaturat minimale do të lëvizin nga -1 deri në 2 gradë Celsius, kurse maksimalet pritet të ngrihen nga 7 deri në 11 gradë. Indeksi biometeorologjik mbetet i pafavorshëm Nga Instituti Hidrometeorologjik i Kosovës bëjnë me dije se kushtet biometeorologjike nuk do të jenë mjaft të favorshme gjatë kësaj javë, për shkak të pranisë së lagështisë, vranësirave të shpeshta dhe uljes së temperaturave. Këto ndryshime të motit mund të shkaktojnë shqetësime te personat me ndjeshmëri të lartë shëndetësore, me theks të veçantë te ata që vuajnë nga sëmundjet kronike, problemet me rrugët e frymëmarrjes si dhe shqetësimet reumatike. Qytetarëve u rekomandohet që t'i përshtatin veshjet me temperaturat e ulëta dhe të tregojnë kujdes gjatë lëvizjeve në ditët me reshje. Kushte pozitive për sektorin e bujqësisë Në krahun tjetër, kushtet agrometeorologjike do të jenë kryesisht të favorshme për pasurimin e tokës me lagështi si dhe për ecurinë e proceseve biologjike te kulturat bujqësore. Reshjet e parashikuara do të ndihmojnë në rritjen e rezervave ujore në tokë, derisa temperaturat e ulëta do të ndikojnë pozitivisht në ngadalësimin e aktivitetit vegjetativ të bimëve. Ekspertët u sugjerojnë fermerëve që dritaret e kohës pa reshje t'i shfrytëzojnë për përmbylljen e punëve të vjeshtës dhe përgatitjen e sipërfaqeve të mbjellura për sezonin e ardhshëm bujqësor.