Kthesa e çuditshme: Si u bind në momentet e fundit heroi i FC Zurich-ut, Selmin Hoxha?

Ndeshja e javës së 12-të në elitën e futbollit zviceran mes Young Boysit dhe FC Zurich-ut, e cila u mbyll me fitoren spektakolare 5:3 në Bernë, solli në qendër të vëmendjes futbollistin me prejardhje nga Kosova, Selmin Hoxha. Ky i fundit ishte protagonist absolut, duke vulosur fatin e takimit falë një goli dhe një asistimi të dhënë në minutat e fundit. Hoxha u hodh në fushë si zëvendësues në minutën e 79-të, për të lënë më pas shenjë me golin e tij të parë në Superligën zvicerane në minutën e 82-të, si dhe me asistimin e regjistruar në minutën e 90+2-të. Megjithatë, prapa këtij suksesi fshihet një prapaskenë interesante, pasi 28-vjeçari paraprakisht nuk kishte aspak dëshirë të aktivizohej në këtë përballje. Shkaku kryesor i kësaj hezitimi ishte fakti se Hoxha sapo ishte rikuperuar gjatë javës nga një lëndim muskulor, të pësuar më parë në Lozanë gjatë një ndeshjeje në fushë me bar artificial – i njëjti lloj terreni si ai në stadiumin Wankdorf në Bernë. “Prandaj isha pak skeptik dhe i pasigurt nëse do të duhej të udhëtoja fare drejtuar Bernës”, pranoi ai pas përfundimit të këtij takimi dramatik. Trajneri i FC Zurich-ut, Marcel Koller, kuptoi menjëherë pasigurinë e mbrojtësit të krahut dhe frikën e tij nga një tjetër dëmtim i mundshëm. Megjithatë, kreu i stafit teknik gjendej para një sfide të madhe, pasi alternativat në stol ishin ngushtuar ndjeshëm, ndërsa në Bernë mungonte edhe futbollisti me përvojë Valon Berisha për shkak dëmtimi. Për këtë arsye, 65-vjeçari Koller vendosi të zhvillojë një bisedë motivuese me lojtarin e tij: “I thashë se gjithçka është çështje psikologjike. Herët a vonë, ai gjithsesi duhet të luajë përsëri në bar artificial. Edhe nëse në Bernë luan vetëm 15 apo 20 minuta, mund ta përballojë këtë përvojë”. Në fund, Hoxha jo vetëm që e përballoi, por e bëri në mënyrën më të shkëlqyer të mundshme. Fillimisht, ai përfitoi nga një top i kthyer pas një goditjeje dënimi për të shënuar për rezultatin 4:3. Më pas, në kohën shtesë, ai kaloi mbrojtësin kryesor të skuadrës vendase, Cédric Zesiger, sikur të ishte një nxënës shkolle, për të asistuar më pas te goli që vulosi shifrat përfundimtare 5:3. Ky duel nxori në pah edhe kontrastin fizik mes dy lojtarëve. Zesiger ka një përvojë prej 72 ndeshjesh në Bundesligën gjermane dhe fizikisht është 1.94 metra i gjatë dhe peshon 83 kilogramë. Nga ana tjetër, me shaka, Hoxha deklaroi pas ndeshjes se është “sigurisht mbi 1.75 metra i gjatë dhe mbi 70 kilogramë”. Pavarësisht diferencave fizike, futbollisti shqiptar u tregua më i zgjuar në atë aksion. “E kërkova duelin me të. I dhashë një shtytje të vogël, por gjithçka ishte brenda rregullave. Pastaj e pashë Umeh Emmanuelin në qendër, i cili ishte lojtari i vetëm në zonën e rreptësisë”, u shpreh ai. Nga dyshimet dhe pasiguria para fillimit të ndeshjes, te paraqitja heroike si zëvendësues, ky ishte një fundjavë e përsosur për Selmin Hoxhën, i cili pas sfidës konfirmoi me bindje: “Muskuli po mban!”.