Zgjerim masiv i sistemit penal: Rusia projekton ndërtimin e shtatë 'superburgjeve' të reja

Autoritetet në Moskë kanë marrë vendimin zyrtar për të ngritur shtatë komplekse moderne paraburgimi dhe vuajtjeje dënimi deri në vitin 2035, një nismë që vjen përmes një dekreti qeveritar që reformon programin federal të sistemit ndëshkimor. Këto qendra të reja, të pagëzuara nga mediat vendase si “superburgje”, parashikohet të kenë një kapacitet të përbashkët prej mbi 20,000 vendesh, ku 5,380 prej tyre do t'i dedikohen personave në paraburgim dhe 15,120 të dënuarve të tjerë. Projektet parashikojnë gjithashtu vendosjen e sallave të gjyqit brenda mjediseve të tyre, si dhe zyra të dedikuara për prokurorët, avokatët mbrojtës dhe komisionet e monitorimit publik. Për menaxhimin dhe sigurinë e këtyre objekteve do të përdoren teknologjitë më të fundit të mbikëqyrjes. Sipas planeve zyrtare, komplekset do të shtrihen në disa zona si Kaluga, Astrakhan, Tyumen, Buryatia, Zabaikalsky Krai, si dhe në pjesën e rajonit ukrainas të Khersonit që ndodhet aktualisht nën kontrollin e ushtrisë ruse. Infrastruktura e parë e këtij laji pritet të inaugurohet në Tatarstan deri në vitin 2030. Përllogaritjet paraprake tregojnë se ndërtimi i një kompleksi të vetëm do të kushtojë mes 134 milionë dhe 208 milionë euro, ndërsa fatura totale e gjithë programit pritet të kalojë shifrën e 2.4 miliardë eurove. Nga ana e saj, Ministria e Drejtësisë e Rusisë argumenton se ky centralizim i qendrave të paraburgimit dhe burgjeve do të sjellë një ulje të shpenzimeve të mirëmbajtjes prej 25 deri në 30 për qind. Kjo do t'i mundësojë projektit të vetëfinancohet brenda një dekade, kryesisht falë shmangies së kostove të transportimit të të burgosurve dhe zvogëlimit të nevojës për staf. Ky plan vjen në një kohë kur popullsia e përgjithshme në burgjet ruse ka shënuar rënie drastike. Në fund të vitit 2021, qendrat e paraburgimit strehonin 465,000 persona, ndërsa shifra ka rënë në 282,000 të burgosur deri në vitin 2026, duke shënuar një tkurrje prej rreth 40%. Kreu i Shërbimit Federal të Burgjeve, Arkady Gostev, deklaroi gjatë muajit maj se dërgimi i të burgosurve si ushtarë me kontratë në vijën e frontit në Ukrainë ka qenë një nga faktorët kryesorë që ka ndikuar në këtë rënie të ndjeshme të numrit të të dënuarve. Praktika e rekrutimit të personave me precedentë penalë nisi në verën e vitit 2022, menjëherë pas fillimit të agresionit ushtarak rus në Ukrainë në muajin shkurt të atij viti, fillimisht përmes strukturës paraushtarake Wagner të kontrolluar nga Kremlini dhe më vonë në mënyrë të drejtpërdrejtë nën administrimin e Ministrisë së Mbrojtjes.