Deputeti i PDK-së bën thirrje urgjente: Qeveria të ndryshojë menjëherë Ligjin për Gjykatën Speciale

Deputeti i Partisë Demokratike të Kosovës, Artan Behrami, ka kërkuar ndërmarrjen e hapave të menjëhershëm për amendamentimin e Ligjit për Gjykatën Speciale, duke e cilësuar këtë si një domosdoshmëri urgjente pas zhvillimeve të fundit. Sipas tij, pas miratimit të Deklaratës që kundërshton vendimin e fundit të kësaj gjykate, ekzekutivi kosovar ka për obligim që pa humbur kohë të procedojë ndryshimet ligjore për Dhomat e Specializuara. "Ndryshimi i Ligjit për Gjykatën Speciale është prova e unitetit të vërtetë. Miratimi i deklaratës me unanimitet të partive shqiptare dhe jo-serbe për krerët e UÇK-së është e rëndësishme! Por, tani urgjentisht, Qeveria e Kosovës duhet të sjellë ndryshimin e Ligjit për Gjykatën Speciale. Vetëm këto ndryshime mund ta rivendosin drejtësinë në Hagë," ka deklaruar Behrami.