Debutuesi Malek El Mala i siguron një pikë dramatike Kolnit në udhëtim ndaj Union Berlinit

Kolni ka arritur të rrëmbejë një barazim të vlefshëm në udhëtim ndaj Union Berlinit, falë një paraqitjeje fantastike dhe golit të shënuar nga Malek El Mala në ndeshjen e tij të parë në elitën e futbollit gjerman. Ndeshja e vlefshme për javën e tetë të Bundesligës, e zhvilluar në stadiumin “An der Alten Försterei”, u mbyll me rezultatin e barabartë 1:1, vetëm pesë ditë pasi Union Berlini kishte triumfuar bindshëm 5:0 ndaj të njëjtit kundërshtar në Kupën e Gjermanisë. Vendasit e nisën sfidën në mënyrë më efektive, duke zhbllokuar shifrat që në minutën e 11-të. Tim Skarke bëri një depërtim mbresëlënës nga krahu dhe shërbeu bukur për Janik Haberer, i cili nga afërsia nuk gaboi për t'i dhënë epërsinë skuadrës së tij. Pjesa e parë solli vështirësi të shumta për mysafirët në fazën e sulmit, ndërsa Union Berlini ishte shumë pranë dyfishimit të epërsisë në minutën e 42-të, kur portieri Schwabe ndaloi goditjen e Burcut duke e dërguar topin në traversë. Edhe fraksioni i dytë i lojës u karakterizua nga një lojë e kujdesshme, ku vendasit u mbrojtën për të ruajtur avantazhin, ndërsa Kolni kërkoi me ngulm hapësira për të barazuar shifrat. Momentit vendimtar i ndeshjes i erdhi koha në minutën e 79-të. Malek El Mala, i hedhur në fushë për të bërë debutimin e tij në Bundesligë, shfrytëzoi në mënyrë perfekte një top të kthyer pas një goditjeje nga këndi dhe e dërgoi topin në rrjetë për 1:1, duke kurorëzuar në mënyrën më të mirë të mundshme ndeshjen e tij të parë. Gjatë gjithë takimit, Kolni ishte skuadër më këmbëngulëse, duke dominuar në posedim me 63 për qind, krahasuar me 37 për qind të Union Berlinit, si dhe duke regjistruar 14 goditje drejt portës kundrejt pesë të vendasve, ndërsa në goditjet nga këndi avantazhi ishte 6 me 2 për mysafirët. Pas këtij barazimi, Kolni renditet në pozitën e 13-të me gjithsej 9 pikë, ndërsa Union Berlini pozicionohet në vendin e 16-të me 7 pikë të tubuara.