Mbledhja e Këshillit të Sigurimit: Presidenca zbulon prapaskenat e diskutimeve për çështjen Hyseni

Këtë të hënë, Presidenti Bajram Begaj ka mbledhur Këshillin e Sigurimit Kombëtar, ku në qendër të vëmendjes kanë qenë ngjarjet e fundit dhe ndikimi i tyre në strukturat e sigurisë së vendit. Përveç përbërjes standarde të përcaktuar me ligj, në këtë takim të rëndësishëm janë ftuar edhe drejtues nga Prokuroria e Përgjithshme dhe Struktura e Posaçme Kundër Korrupsionit dhe Krimit të Organizuar (SPAK). Sipas njoftimit zyrtar të Presidencës, bashkëbisedimi është fokusuar tek intensifikimi i bashkëpunimit mes institucioneve, bashkërendimi i veprimeve me partnerët ndërkombëtarë, si dhe rikthimi dhe rritja e besimit të qytetarëve te shteti. Në fund të takimit, u vu theksi te fakti se agjencitë e sigurisë nuk duhet të shihen si rivale të njëra-tjetrës, por si bashkëpunëtore në mbrojtje të interesave të vendit. “Për sigurinë kombëtare, institucionet nuk konkurrojnë me njëri-tjetrin. Ato kanë përgjegjësi të ndryshme, por i shërbejnë të njëjtit interes, sigurisë së Republikës së Shqipërisë”, theksohet në përfundimet e kësaj mbledhjeje. Gjithashtu, Këshilli ka bërë thirrje për ruajtjen e pavarësisë së plotë të hetimeve të drejtësisë dhe respektimin e tyre nga çdo strukturë shtetërore. “Hetimet e drejtësisë të zhvillohen tërësisht të pavarura dhe të respektohen nga të gjithë. Çështjet individuale të mos kthehen në krizë besimi ndaj shtetit dhe ndaj institucioneve të sigurisë”, bëhet e ditur në deklaratë. Një tjetër pikë e rëndësishme e diskutimit ishte nevoja për rritjen e transparencës, llogaridhënies dhe mbikëqyrjes institucionale, duke kërkuar që strukturat shtetërore t'i dëshmojnë publikut aftësinë për vetëkorrigjim dhe mbrojtje të interesit të përgjithshëm. Në mbyllje, Këshilli i Sigurimit Kombëtar vlerësoi se Shqipëria zotëron institucionet, aleatët ndërkombëtarë dhe kapacitetet e duhura njerëzore për t'i bërë ballë çdo sfide të sigurisë. Këshilli i Sigurimit Kombëtar shërben si një organ këshillimor pranë Presidentit të Republikës dhe nuk ka kompetenca vendimmarrëse, ndërsa mbledhjet e tij mbahen tradicionalisht me dyer të mbyllura.