Prapaskenat e skandalit te Evertoni: Pse Jack Grealish u la jashtë skuadrës nga David Moyes?

Ylli i Evertonit, Jack Grealish, po përballet me masa të rrepta disiplinore, pasi është lënë jashtë listës së skuadrës për sfidën e Kupës së Ligës kundër Newcastle United, si pasojë e një situate të papranueshme jashtë fushës së blertë. Sipas informacioneve të siguruara nga e përditshmja angleze “The Sun”, ngjarja ka ndodhur pak ditë para një seance vendimtare stërvitore, kur mesfushori kishte vendosur të argëtohej deri në orët e vona të natës, duke thyer rregullat e klubit. Më 19 tetor, pasi kishte marrë pjesë në ceremoninë prestigjioze të ndarjes së çmimeve “Pride of Britain” në kryeqytetin britanik, Grealish është drejtuar për në lokalin BAM Karaoke Box në shoqërinë e miqve të tij, ku ka qëndruar deri në agim. Një dëshmitar okular ka treguar për “The Sun” se grupi kishte mbërritur me vonesë të madhe, duke konsumuar sasi të mëdha alkooli dhe duke interpretuar këngë të ndryshme deri në momentin e largimit në orët e para të mëngjesit. Pavarësisht kësaj nate të gjatë, futbollisti është kthyer në qytetin e Liverpoolit të martën në mëngjes, duke u paraqitur në kompleksin stërvitor të Evertonit për të marrë pjesë në seancën e drejtuar nga trajneri David Moyes. Megjithatë, sjellja e tij ka vijuar të jetë problematike, pasi po atë mbrëmje ai ka dalë sërish, kësaj radhe i shoqëruar nga shokët e ekipit Jordan Pickford, Tyler Dibling dhe Kyle Walker, duke shfrytëzuar faktin se të mërkurën lojtarët kishin ditë pushimi. Sipas një dëshmitari të dytë, lojtarët janë mbledhur në zonën VIP të lokalit Mucky Pub në Wilmslow për të ndjekur përballjen mes Paris Saint-Germain dhe Barcelonës, ku gjithashtu kanë konsumuar sasi të konsiderueshme pijesh alkoolike.