Valë dhune dhe plaçkitjesh në Frankfurt: Autoritetet premtojnë dënime shembullore për protestuesit

Autoritetet e larta gjermane kanë dhënë paralajmërime të forta për ndëshkime të rënda ndaj personave të përfshirë në akte vandalizmi dhe sulme ndaj policisë, pas incidenteve të rënda që tronditën qytetin e Frankfurtit dhe lanë të plagosur mbi 100 efektivë të forcave të rendit. Mbrëmë, Frankfurti u shndërrua në vatrën kryesore të protestave të dhunshme, pasi gjatë ditës dhjetëra mijëra qytetarë kishin marshuar në disa qytete të Gjermanisë për të kërkuar standarde më të larta në arsim dhe ulje të kostove të jetesës. Këto tubime u organizuan dhe drejtuan nga lëvizja e njohur si "Gen Z regelt". Në një konferencë për media të mbajtur këtë të sotme, ministri i Brendshëm i landit të Hessenit, Roman Poseck, bëri të ditur se në zemrën financiare të Frankfurtit, protestues të maskuar me kapela shkatërruan 17 biznese dhe grabitën pesë prej tyre. Poseck bëri me dije se në terren u mobilizuan 1.300 efektivë policie, ndërsa numri i policëve të lënduar gjatë përleshjeve i kaloi të 100-të. Gjatë ndërhyrjes, forcat e sigurisë prangosën 54 demonstrues, mosha e të cilëve luhatet nga 13 deri në 29 vjeç. "Jam i tronditur nga ajo që pashë dhe nuk ka kuptim të zbukurohet situata. Më lejoni të jem shumë i qartë: kështu nuk mund të vazhdohet më", deklaroi Poseck, duke vënë në dukje se pjesa më e madhe e personave të ndaluar janë shtetas gjermanë. Duke iu referuar të dhënave preliminare të policisë, ai shtoi se një pjesë e konsiderueshme e atyre që u përfshinë në këto trazira i përkasin komuniteteve me prejardhje emigrante. "Policia aktualisht vlerëson se bëhet fjalë për një grup prej 1.000 deri në 1.500 protestues të dhunshëm, kryesisht me prejardhje emigrante", theksoi ministri. Sipas raportimeve nga Policia e Frankfurtit, situata u karakterizua nga akte të papara dhune, ku u shkatërruan vitrina dyqanesh dhe u hodhën mjete shpërthyese, si kokteje molotov, në drejtim të zyrtarëve të policisë. Në një reagim të dhënë për median, ministri gjerman Alexander Dobrindt u shpreh se të gjithë individët e përfshirë në këto akte shkatërrimi dhe plaçkitje do të identifikohen me saktësi dhe do të përballen me forcën e ligjit.