Arritje historike për Hansi Flick: Trajneri gjerman kap shifrën e 100 fitoreve në krye të Barcelonës

Barcelona ka lënë pas momentin e vështirë duke dhuruar një paraqitje fantastike në La Liga, ku ka mposhtur Alavesin me rezultatin e thellë 6:1. Ky triumf spektakolar nuk i ka dhënë vetëm tri pikë të arta skuadrës katalanase, por ka shënuar edhe një moment tejet domethënës për teknikun Hansi Flick. Pas disfatave zhgënjyese së fundmi, si ajo 4-2 ndaj Paris Saint-Germainit në Ligën e Kampionëve dhe humbja 2-1 në “El Clasico” përballë Real Madridit, katalanasit reaguan fuqishëm. Me këtë fitore të nëntë në kampionat dhe me një dominim total në fushë, ata treguan se potenciali sulmues mbetet në nivele të larta. Për Hansi Flickun, kjo ndeshje kishte një peshë të veçantë, pasi përkoi me fitoren e tij të 100-të si drejtues i skuadrës blaugrana, një objektiv i arritur pas vetëm 131 sfidash në stolin e katalanasve. Gjatë këtij rrugëtimi, statistikat e tij flasin për 100 fitore, 10 barazime dhe 21 humbje, me një bilanc prej 375 golash të shënuar dhe 153 të pësuar. Mesatarja prej 2.37 pikësh për ndeshje e afron atë me periudhën e artë te Bayern Munichi, ku kishte regjistruar 2.53 pikë për ndeshje në 86 takime. Megjithatë, strategu 61-vjeçar ka preferuar të mos bëjë paralele mes dy eksperiencave të tij. “Nuk më pëlqen aspak kjo. Skuadra është tjetër, situata është krejtësisht ndryshe”, u shpreh ai, duke shtuar se në futboll gjërat ndryshojnë me shpejtësi dhe se preferon të fokusohet te e ardhmja pa harruar mësimet e së kaluarës. Ky sukses e rendit Flickun si trajnerin e tetë në historinë e lavdishme të Barcelonës që arrin 100 fitore. Vetëm Luis Enrique ka arritur më shpejt se ai te kjo shifër, duke i regjistruar 100 fitore në 126 ndeshje, ndërsa Flickut iu deshën pesë sfida më shumë. Pavarësisht kësaj, gjermani ka zgjedhur t'ia dedikojë suksesin grupit: “Kjo nuk ka të bëjë me mua. Ka të bëjë me skuadrën, tifozët dhe klubin”, deklaroi ai, duke falënderuar mbështetësit për mbështetjen e palëkundur gjatë javëve të vështira. Forma e jashtëzakonshme e Barcelonës pasqyrohet qartë edhe te statistikat e repartit ofensiv. Ekipi ka shënuar plot 46 gola në 11 ndeshjet e para të këtij sezoni, një shifër mbresëlënëse që në histori të futbollit spanjoll është tejkaluar vetëm nga Athletic Bilbao, e cila kishte realizuar 49 herë në të njëjtën fazë të sezonit 1940/41, duke dëshmuar fuqinë e frikshme sulmuese të katalanasve nën drejtimin e Flick.