Forma e shkëlqyer e Tottenhamit, De Zerbi zbulon sekretin e kthesës së madhe në Premier League

Tottenham Hotspur po kalon një periudhë tejet pozitive në Premier League, duke arritur të regjistrojë tri fitore radhazi në kampionat për herë të parë pas plot 616 ditësh. Ky hov i suksesshëm konfirmon përmirësimin e dukshëm të formës së skuadrës londineze gjatë javëve të fundit. Në sfidën e fundit, Tottenhami mposhti Crystal Palace me rezultatin 2-0, duke shfrytëzuar me sukses edhe epërsinë numerike në fushë pasi kundërshtari mbeti me dhjetë lojtarë. Megjithatë, sipas trajnerit Roberto De Zerbi, ky sukses nuk lidhet vetëm me anën taktike, por mbi të gjitha me forcimin e mentalitetit dhe bashkëpunimit mes futbollistëve. Një nga momentet kyçe të këtij transformimi, sipas teknikut italian, ka qenë një udhëtim i përbashkët në Marbella, i cili i dha mundësi grupit të lidhej më shumë jashtë fushës. Ky bashkim forcoi unitetin e munguar, sidomos duke pasur parasysh se klubi kishte investuar rreth 380 milionë funte gjatë merkatos së verës për të afruar dhjetë lojtarë të rinj me mbështetjen e familjes Lewis, një proces integrimi që kërkoi kohën e vet. De Zerbi pranoi se shenja pozitive kishte pasur edhe para ndërprerjes për shkak të ndeshjeve kombëtare, por mungesa e vazhdimësisë dhe gabimet naive kishin penalizuar rezultatet. “Mendoj se edhe përpara pauzës së kombëtareve po luanim mirë. Ndoshta jo gjatë të gjitha 90 minutave, por në shumë periudha të ndeshjeve zhvillonim lojë shumë të mirë”, u shpreh trajneri italian. “Problemi ishte se nuk shënonim. Më pas pësonim ndonjë gol të panevojshëm dhe humbnim energjinë, shpirtin luftarak dhe lidhjen e duhur mes lojtarëve”, shtoi ai për ESPN. Në fund, tekniku theksoi se ndryshimi më thelbësor tashmë shihet qartë në fushën e blertë, ku grupi funksionon si një trup i vetëm. “Nëse e krahasojmë Tottenhamin para pauzës së kombëtareve me atë pas pauzës, tani po luajmë si skuadër. Më parë kishim shumë futbollistë të mirë, por nuk funksiononim si ekip”, përfundoi De Zerbi.