Dy talentët e Superligës Zvicerane në radarët e FSHF-së, kuqezinjtë synojnë të sigurojnë shërbimet e tyre

Futbollistët me origjinë shqiptare, Samuel Krasniqi dhe Lutfi Dalipi, të cilët po shkëlqejnë në fushën e gjelbër të Zvicrës, kanë tërhequr vëmendjen serioze të strukturave drejtuese të Kombëtares shqiptare. Sipas raportimeve të mediave helvete, një delegacion zyrtar i Federatës Shqiptare të Futbollit ishte i pranishëm në shkallët e stadiumit për të ndjekur hap pas hapi paraqitjen e dy lojtarëve: 21-vjeçarit të Grasshopperit, Samuel Krasniqi, dhe 20-vjeçarit të Vaduzit, Lutfi Dalipi. Ky interesim vjen në një kohë kyçe, pasi të dy djemtë kanë qenë së fundmi pjesë e seleksionit U-21 të Zvicrës gjatë angazhimeve ndërkombëtare, duke rihapur debatin e zakonshëm rreth talenteve me dyshtetësi dhe zgjedhjeve të tyre të ardhshme në skenën ndërkombëtare. Nga ana e tij, trajneri i Vaduzit, Marc Schneider, i cili ishte njohur vetëm të shtunën me praninë e vëzhguesve kuqezinj, ka komentuar presionin në rritje që po përjeton Lutfi Dalipi. “Situata ka ndryshuar rrënjësisht; deri në verë askush nuk e njihte Lutfiun, ndërsa tani rreth tij është krijuar një vëmendje e jashtëzakonshme. Kjo nuk është e lehtë për një lojtar të ri dhe ne kemi detyrim ta mbrojmë”, u shpreh Schneider. Tekniku shtoi se janë të nevojshme biseda të hapura me futbollistin që ai të ruajë fokusin, duke theksuar se i gjithë stafi e vlerëson maksimalisht dhe i jep liri veprimi në fushë, pavarësisht gabimeve të vogla. Ndërkohë, trajneri i Grasshopperit, Olaf Janssen, theksoi se lojtarët e rinj kanë nevojë të madhe për mbështetje institucionale dhe familjare gjatë këtyre momenteve të rëndësishme të karrierës. “Ëndrra e çdo fëmije është të luajë për një përfaqësuese kombëtare. Tani mbetet për t'u parë se si do të reagojnë djemtë ndaj këtij presioni”, deklaroi Janssen, duke shtuar se nuk ka frikë se Samuel Krasniqi do të shpërqendrohet. Sipas tij, Krasniqi është ende në fazë rritjeje dhe ndonjëherë tenton të bëjë gjithçka vetë në fushë, çka mund t'i shërbejë si pengesë. “Ndonjëherë më pak është më shumë. Për të bërë hapin e radhës përpara, Samueli duhet të tregojë më shumë qartësi në vendimet e tij”, u shpreh ai, duke shtuar se potenciali i mesfushorit mbetet ende i pashfrytëzuar plotësisht. Prania e zyrtarëve nga Tirana pritet të vërë në lëvizje edhe Federatën Zvicerane të Futbollit (SFV), e cila mund të shtojë përpjekjet për t'i mbajtur lojtarët. Megjithatë, deri në këto momente, as Samuel Krasniqi dhe as Lutfi Dalipi nuk kanë marrë një vendim përfundimtar mbi fanellën që do të përfaqësojnë në të ardhmen, ndërsa mbetet për t'u parë nëse diplomacia sportive e Shqipërisë do të arrijë t'i bindë ata.