Hoti akuzon ekzekutivin për shkelje të re ligjore: Tejkalohet afati për dërgimin e projektbuxhetit në Kuvend

Ish-kreu i ekzekutivit të Kosovës dhe aktualisht deputet nga radhët e Lidhjes Demokratike të Kosovës (LDK), Avdullah Hoti, ka ashpësuar tonet ndaj Qeverisë Kurti, duke e akuzuar për mosrespektim të ligjit për shkak të mosmiratimit brenda afatit të buxhetit për vitin e ardhshëm. Përmes një reagimi në rrjetin social Facebook, Hoti vuri në dukje se neni 22 i Ligjit për Menaxhimin e Financave Publike obligon ekzekutivin që t'ia dorëzojë Kuvendit të Kosovës projektbuxhetin jo më vonë se më 31 tetor. Ai nëvizoi se sot, më 1 nëntor, ky dokument i rëndësishëm ende nuk është miratuar nga kabineti qeveritar, duke krijuar paqartësi se si do të shqyrtohet ai në procedura parlamentare pas skadimit të afatit ligjor. Sipas deputetit të LDK-së, një lëshim i tillë procedural nuk ka ndodhur asnjëherë më parë në praktikat e kaluara shtetërore. Ai rikujtoi se edhe gjatë kohës së zgjedhjeve apo në kushtet kur vendi administrohej nga një qeveri në detyrë, projektbuxheti është proceduar gjithmonë në Kuvend sipas kërkesave dhe afateve të përcaktuara me ligj. Më tej, Hoti potencoi se shkeljet e kuadrit normativ dhe kushtetues janë kthyer tashmë në një zakon përgjatë këtij mandati të Lëvizjes Vetëvendosje dhe aleatëve të saj në pushtet. Në këtë kuadër, ai përmendi vendimet e Gjykatës Kushtetuese që kanë shpallur jokushtetuese dhjetëra ligje, si dhe shkeljet e vazhdueshme përmes shkarkimeve apo mos-emërimeve të zyrtarëve të lartë shtetërorë nga ana e Qeverisë dhe Presidencës. Po ashtu, ai nënvizoi se legjislatura aktuale u konstituua jashtë afateve kushtetuese, kryeministri po shmang përgjigjet ndaj organeve të drejtësisë, ndërsa drejtuesit e ekzekutivit kanë rënë ndesh edhe me aktgjykimin e Gjykatës Supreme duke ushtruar njëkohësisht detyrën e anëtarit të qeverisë dhe atë të deputetit.