Bërvenica në votime: KSHZ aktivizon linjat e ndihmës për qytetarët

Sot, komuna e Bërvenicës po zhvillon raundin e dytë të zgjedhjeve të jashtëzakonshme për kryetar komune. Procesi zgjedhor vjen pas humbjes së parakohshme të ish-kryetarit Jovica Ilievski, i cili ndërroi jetë në muajin qershor. Në përpjekje për të lehtësuar procesin e votimit dhe për të ofruar mbështetje për të gjithë banorët, Komisioni Shtetëror i Zgjedhjeve (KSHZ) ka njoftuar se, njësoj si në raundin e parë, qytetarët mund të kontaktojnë linjën telefonike 0800 555 44 për çdo paqartësi apo informacion që lidhet me realizimin e së drejtës së tyre për të votuar. KSHZ-ja ka menduar edhe për personat me dëgjim të dëmtuar, duke vënë në dispozicion numrin 076 488 360. Përmes këtij kontakti, votuesit mund të realizojnë video-thirrje, ku informacioni do t'u ofrohet në gjuhën e shenjave nga personeli i specializuar.