Flick i vë detyra Lamine Yamalit pavarësisht paraqitjes maestrale ndaj Alavesit

Strategu i Barcelonës, Hansi Flick, vlerëson se ylli i ri Lamine Yamal ka ende hapësira për t'u rritur dhe nuk e ka prekur ende kulmin e karrierës së tij, pavarësisht paraqitjes fantastike në triumfin e thellë 6-1 kundër Alavesit. Megjithatë, kreu i stafit teknik u nda tejet i kënaqur me kontributin e anësorit, të cilin vendosi ta kursejë duke e zëvendësuar në pjesën e dytë të takimit. Talenti katalanas la gjurmë të pashlyeshme në këtë duel duke realizuar dy herë dhe duke dhuruar një asistim vendimtar. Këto statistika i dhanë mundësi skuadrës të siguronte një fitore komode në “Camp Nou”, duke rimarrë kështu kreun e renditjes në La Ligë. Gjatë prononcimit të tij, Flick zbuloi se kishte pasur një bisedë kokë më kokë me Yamalin gjatë intervalit të ndeshjes, me synimin parësor për t'i dhënë atij shtysë emocionale dhe për t'i rikthyer sigurinë në duelet individuale. “Kur realizon dy herë, gjërat bëhen më të thjeshta kur largohesh nga fusha. Bisedova me të gjatë pushimit. Ai ka nevojë të rimarrë besimin e plotë në vetvete, sidomos në situatat një kundër një. Gjithashtu, menaxhimi i energjive dhe pushimi janë thelbësore. Ai bëri një paraqitje fantastike”, u shpreh trajneri gjerman. Tekniku gjithashtu vuri inxhinierinë e tij në menaxhimin e minutave të lojtarit të ri, duke lënë të kuptohet qartë se doza e duhur e pushimit është pjesë e pandashme e planit për ta sjellë atë në formën e tij ideale fizike dhe teknike. Në fund të analizës së tij, Flick nuk la pa përmendur as kontributin e rëndësishëm të Fermín Lópezit dhe Raphinhas, duke e vënë theksin te potenciali i lartë sulmues që zotërojnë. “Paraqitja e tij është e jashtëzakonshme, njësoj si ajo e Fermínit dhe Raphinhas. Kjo është fytyra që kërkoja të shihja pas disfatave të fundit. Përgjigjja e skuadrës ishte e shkëlqyer”, përfundoi numri një i stolit të Barcelonës.