Debati për provimin e jurisprudencës: ASH thumbon VLEN-in për ndikimin e vogël qeveritar ndaj ZNAM-it

Aleanca për Shqiptarët ka reaguar ashpër ndaj propozimit të ministrit të Drejtësisë, Jeton Shasivari, sipas të cilit vetëm 12 provime teorike do të mund të mbahen në gjuhën shqipe, kurse 2 provimet praktike do të zhvillohen ekskluzivisht në gjuhën maqedonase. Sipas kësaj partie, një nismë e tillë ka gjeneruar me të drejtë revoltë dhe pakënaqësi të thella mes studentëve shqiptarë. Pozicioni i studentëve mbetet i palëkundur dhe i qartë: provimi i jurisprudencës duhet të organizohet në tërësi në gjuhën shqipe, duke respektuar plotësisht të drejtat kushtetuese dhe dispozitat e Ligjit për përdorimin e gjuhëve. "Ndërkohë që studentët shqiptarë presin zgjidhje, ministri Shasivari propozon një model të pjesshëm dhe paralajmëron dërgimin e çështjes në Komisionin e Venecias. Pas dy gjeneratash pritjeje, zvarritja e mëtejshme e kësaj çështjeje është e papranueshme", thuhet në reagimin e ASH-së. Në këtë kontekst, nga Aleanca për Shqiptarët vënë në dukje deklaratën e Maksim Dimitrievskit, kryetar i ZNAM-it dhe partner në koalicionin qeveritar, i cili ka theksuar se gjuha maqedonase përbën vijë të kuqe për formacionin e tij politik dhe nuk do të lejojë që provimi i jurisprudencës të zhvillohet në gjuhën shqipe. Kjo qasje e Dimitrievskit, krahasuar me heshtjen apo mungesën e vendosmërisë së VLEN-it, ilustron qartë disbalancën e forcave brenda kabinetit qeveritar. ZNAM, pavarësisht numrit më të vogël të deputetëve, arrin të imponojë kushte dhe të mbrojë hapur qëndrimet e veta, ndërsa VLEN, me peshë më të madhe parlamentare, vazhdon të bëjë lëshime edhe për çështje që dikur përbënin premtime kryesore elektorale. "Si ka mundësi që Dimitrievski, me më pak deputetë, ka më shumë ndikim në Qeveri sesa të gjithë përfaqësuesit e VLEN-it së bashku?", pyesin retorikisht nga ASH. Sipas partisë opozitare, VLEN-i kishte garantuar se provimi i jurisprudencës dhe provimet e tjera profesionale do të ishin plotësisht në dispozicion në gjuhën shqipe. Mirëpo, sot, pas më shumë se dy vitesh ushtrim pushteti, studentëve u servohet një alternativë e cunguar, ndërkohë që partnerët maqedonas të koalicionit ngrenë barriera dhe refuzojnë çdo kompromis. "Kjo situatë ngre pyetje serioze për ndikimin real të VLEN-it në vendimmarrjen qeveritare. Nëse një partner me më pak deputetë arrin të imponojë qëndrimet e tij, atëherë përse VLEN nuk arrin të sigurojë respektimin e një kërkese kaq të rëndësishme për studentët shqiptarë? Pas dy gjeneratash pritjeje dhe më shumë se dy vitesh qeverisjeje, studentët meritojnë një përgjigje përfundimtare. VLEN duhet të marrë përgjegjësinë për premtimet e veta dhe të dëshmojë se ka ndikimin e nevojshëm për t’i realizuar ato", vijon deklarata e ASH-së. Në përmbyllje, Aleanca për Shqiptarët shpreh mbështetjen e pakushtëzuar ndaj kauzës së studentëve, duke i bërë thirrje ministrit Shasivari dhe funksionarëve të VLEN-it që të tërheqin menjëherë skemën aktuale dhe të ndërmarrin veprimet e duhura për sigurimin e provimit të jurisprudencës tërësisht në gjuhën shqipe. "Dimitrievski i ka vendosur vijat e kuqe të ZNAM-it. Është koha që VLEN të tregojë nëse ka guximin politik të mbrojë të drejtat e shqiptarëve me të njëjtën vendosmëri", përfundon reagimi.