Hetimet për terrorizëm në Gjermani: Lirohet 19-vjeçari me shtetësi kosovare, në paraburgim i dyshuari kryesor

Autoritetet gjermane kanë vënë në shënjestër të hetimeve për planifikim të një sulmi terrorist një 19-vjeçar me shtetësi të dyfishtë, gjermane dhe kosovare. Sidoqoftë, ndaj të riut, i identifikuar si Adnan R. nga qyteti i Hagenit, nuk është caktuar masa e paraburgimit për shkak të mungesës së bazës ligjore, ndërsa mediat vendase raportojnë se ai mund të lirohet tërësisht nga hetimet. Nga ana tjetër, Prokuroria e Dyseldorfit ka konfirmuar se i dyshuari kryesor në këtë rast është një 23-vjeçar nga Unna. Ai tashmë ndodhet prapa grilave nën masën e paraburgimit, për shkak të rrezikut të ikjes nga drejtësia. Sipas të dhënave të grumbulluara, organet e sigurisë i kishin marrë nën vëzhgim të dyshuarit dhe kishin përgjuar bisedat e tyre. Gjatë muajit shtator, ata kishin diskutuar për mundësinë e realizimit të një sulmi si dhe për blerjen e dy armëve automatike të llojit AK-47, me një çmim prej rreth 1.000 eurosh për copë. Megjithëse caku specifik i sulmit mbetet i necaktuar, si mjete të mundshme për kryerjen e tij ishin përmendur armët e zjarrit, thikat apo përdorimi i automjeteve. Më 1 tetor, njësitë speciale të policisë ndërmorën aksione kontrolli në disa banesa në Unna dhe Hagen, mirëpo gjatë bastisjeve nuk u gjet asnjë armë. Në kuadër të këtij procesi u verifikuan edhe dy shtetas sirianë të moshave 20 dhe 24 vjeç, por ndaj tyre nuk është ngritur ndonjë akuzë për shkak të mungesës së provave inkriminuese. Prokuroria nuk ka dhënë detaje të mëtejshme rreth këtij rasti, ndërsa për të gjithë të përfshirët vlen parimi kushtetues i prezumimit të pafajësisë.