Vazhdojnë protestat në kryeqytet: Sot kërkohet sërish drejtësi për vrasjen e Arlinda Zekajt

Kryeqyteti do të jetë sërish vatër e revoltës qytetare, teksa sot po shënohet dita e pestë me radhë e protestave ku kërkohet me ngulm drejtësi për vrasjen e Arlinda Zekajt. Sipas njoftimit, tubimi protestues është caktuar të nisë nga ora 17:00, duke u grumbulluar fillimisht në sheshin “Zahir Pajaziti” në Prishtinë. Kolektivi për Mendim dhe Veprim Feminist po vazhdon të ngrejë zërin për këtë ngjarje të rëndë të ndodhur në Vitomiricë të Pejës, duke kërkuar llogaridhënie të plotë dhe ndëshkimin e përgjegjësve. “Të dielën bëhen shtatë ditë nga dita kur Arlinda Zekaj u vra e pesë ditë që ne jemi në rrugë duke kërkuar drejtësi për të e për çdo grua të vrarë. Pesë ditë që me ngulm kërkojmë siguri dhe liri për çdo grua të gjallë. Kërkesat tona janë të qarta por shteti vazhdon të refuzojë të na dëgjojë.”, thuhet në njoftimin e Kolektivit. Aktivistët e kësaj lëvizjeje kanë bërë të ditur se aksionet e tyre nuk do të ndalen derisa të gjitha institucionet që dështuan në rastin e Arlinda Zekajt të japin përgjegjësi. “Ne nuk zmbrapsemi dhe çdo ditë që çel do të na gjejë në sheshe e përballë institucioneve që e dështuan Arlindën e po vazhdojnë ta dështojnë çdo çikë e gru në Kosovë. Këtë të diel mos rrini në shtëpi, dilni e bashkohuni në protestë. Le ta çojmë amanetin e Arlindës në vend.”, thuhet në njoftim.