Kujtohet figura e Zahir Pajazitit: Sot shënohet ditëlindja e komandantit emblemë të UÇK-së

Më 1 nëntor shënohet ditëlindja e një prej figurave më qendrore të luftës çlirimtare, komandantit të Ushtrisë Çlirimtare të Kosovës dhe heroit kombëtar, Zahir Pajaziti. I lindur më 1 nëntor të vitit 1962 në fshatin Turuqicë të Podujevës, Pajaziti ra heroikisht më 31 janar 1997 në Pestovë të Vushtrrisë. Në të njëjtën ditë, në altarin e lirisë ra edhe dyshja e bashkëluftëtarëve të tij të ngushtë, Hakif Zejnullahu dhe Edmond Hoxha. Për meritën dhe sakrificën e tij sublime për atdheun, më 31 janar 2008, pikërisht në 11-vjetorin e rënies, ish-presidenti Fatmir Sejdiu i akordoi Zahir Pajazitit dekoratën më të lartë shtetërore, Urdhrin "Hero i Kosovës". Për të nderuar jetën dhe veprën e tij gjatë ditës së sotme, Komuna e Podujevës, në bashkëpunim me shoqatat e dala nga lufta, organizon një ceremoni përkujtimore në Kompleksin Memorial në Orllan. Po ashtu, homazhe dhe nderime pranë shtatores së heroit në Prishtinë do të kryejë edhe Ramush Haradinaj.