Tragjedi në Itali: 20-vjeçari shqiptar humb jetën pasi goditet nga makina teksa përpiqej të sinjalizonte rrezikun

Një ngjarje e rëndë ka tronditur komunitetin shqiptar në Itali, ku 20-vjeçari Thomas Qirjaj ka ndërruar jetë tragjikisht pas një aksidenti rrugor të regjistruar në autostradën A1, pranë zonës së Melegnanos. Sipas raportimeve nga shteti fqinj, i riu po udhëtonte të premten nën shoqërinë e katër miqve të tij me një automjet tip Volvo me targa zvicerane. Pasi kishin kaluar barrierën e autostradës, mjeti ka dalë nga kontrolli duke u përplasur me barrierën ndarëse të korsive të lëvizjes. Menjëherë pas goditjes, Thomas ka zbritur nga makina me qëllim vendosjen e trekëndëshit të emergjencës për të shmangur rrezikun për drejtuesit e tjerë. Fatkeqësisht, pikërisht në atë moment, ai është përplasur fuqishëm nga një fuoristradë e drejtuar nga një 25-vjeçar nga Modena, i cili nuk ka mundur ta shohë të riun në errësirë deri në sekondat e fundit. I riu është dërguar me shpejtësi në spitalin Predabissi në Vizzolo, por pavarësisht ndërhyrjes së mjekëve, ai nuk ka mundur t'u mbijetojë plagëve të rënda. Ndërkohë, katër shokët e tij që ndodheshin në makinë kanë shpëtuar pa lëndime serioze. Thomas Qirjaj ishte fëmijë i vetëm i një familjeje shqiptare dhe jetonte bashkë me prindërit e tij në Caorso, në provincën e Piacenzës. Autoritetet kompetente, përkatësisht policia rrugore italiane dhe Prokuroria e Lodit, kanë nisur zyrtarisht hetimet për të hedhur dritë mbi rrethanat e plota të këtij aksidenti fatal.