Shtrëngohen rregullat për turizmin: Qiratë ditore kalojnë në e-Albania, gjoba deri në 400 mijë lekë për shkelësit

Sektori i akomodimit me qira të shkurtra, si apartamentet, vilat apo dhomat, do t'i nënshtrohet një kuadri të ri ligjor. Drafti i ri për turizmin përcakton detyrimin që çdo pronar, qoftë kur ofertat jepen drejtpërdrejt apo përmes platformave si Booking dhe Airbnb, të regjistrojë pronën e tij nëpërmjet portalit qeveritar e-Albania. Në bazë të kësaj nisme, para se të nisë ushtrimi i aktivitetit, çdo subjekt duhet të pajiset me një kod unik identifikimi. Ky kod do të jetë i detyrueshëm për t'u shfaqur në të gjitha njoftimet, reklamat apo ofertat që publikohen në internet, me qëllim formalizimin dhe evidentimin e plotë të tregut të akomodimit ditor. Ndryshimet nuk ndalen vetëm këtu, pasi ato prekin edhe agjencitë turistike. Drafti parashikon krijimin e një fondi të veçantë për të kompensuar udhëtarët në raste falimentimi të operatorëve për shërbimet e anuluara. Gjithashtu, agjencitë do të detyrohen të sigurojnë përgjegjësinë ndaj palëve të treta. Një tjetër risi lidhet me menaxhimin e stacioneve të plazhit, të cilat tashmë do të jenë të detyruara të lejojnë kalimin e lirë dhe të papenguar të pushuesve drejt vijës bregdetare, duke hequr çdo lloj gardhi apo pengese fizike. Paketa e re parashikon masa të rrepta ndëshkimore, ku gjobat mund të shkojnë deri në 400 mijë lekë. Për ilustrim, mungesa e një vrojtuesi plazhi do të sanksionohet me 200 mijë lekë gjobë, ndërsa nëse shkelja përsëritet, vlera e ndëshkimit do të dyfishohet duke arritur në 400 mijë lekë. Ky projektligj aktualisht është duke kaluar fazën e konsultimit me grupet e interesit dhe ende nuk ka marrë statusin e një ligji përfundimtar në fuqi.