Bumi turistik në Shqipëri: Qeveria synon mbi 15 milionë vizitorë të huaj deri në vitin 2027

Sektori i turizmit në Shqipëri po përgatitet për një transformim rrënjësor, duke synuar kalimin nga modeli sezonal në një ofertë turistike të hapur gjatë gjithë vitit. Ky është fokusi kryesor i strategjisë afatmesme të qeverisë shqiptare për periudhën 2027-2029. Referuar relacionit të projektbuxhetit, ambicia kryesore është fuqizimi i ndjeshëm i këtij sektori në ekonominë e vendit. Kontributi i turizmit në Prodhimin e Brendshëm Bruto (PBB) pritet të ngjitet në nivelin 33% përgjatë harkut kohor 2027-2029, duke shënuar një rritje të ndjeshme krahasuar me 26,4% që ishte regjistruar në vitin 2025. Veëmendje e madhe i kushtohet gjithashtu zhvillimit rajonal dhe tregut të punës. Parashikimet zyrtare tregojnë se punësimi në fushën e turizmit do të njohë rritje të qëndrueshme, duke kaluar nga 8,6% në vitin 2026 në 8,7% gjatë vitit 2027, për t'u ngjitur më pas në 8,8% përgjatë viteve 2028-2029. Krahas kësaj, planifikohet një zgjerim i ndjeshëm i kapaciteteve pritëse në territorin e vendit. Numri i strukturave akomoduese llogaritet të rritet nga 2 100 njësi në vitin 2027, për të arritur në 2 150 njësi në përfundim të vitit 2029. Një tjetër shtyllë e rëndësishme e këtij zhvillimi është edhe lulëzimi i agroturizmit. Bazuar në të dhënat zyrtare qeveritare, subjektet e licencuara në këtë sektor parashikohet të shtohen ndjeshëm, nga 400 biznese në vitin 2027 në 650 të tilla deri në vitin 2029. Përsa i përket fluksit të vizitorëve ndërkombëtarë, Shqipëria synon shifra rekord. Numri i shtetasve të huaj që pritet të hyjnë në vend parashikohet të arrijë në 15,5 milionë gjatë vitit 2027, ndërsa kjo shifër do të vazhdojë rritjen për të kapur kuotën e 16 milionë vizitorëve deri në vitin 2029.