Prishtina 2030 në fokus: Kosova kërkon ekspertizën franceze për infrastrukturën dhe transportin e Lojërave Mesdhetare

Autoritetet e Kosovës dhe ato franceze kanë hedhur hapa konkretë drejt zgjerimit të partneritetit dypalësh, me synim mbështetjen e përgatitjeve për organizimin e Lojërave Mesdhetare “Prishtina 2030”. Vëmendja kryesore e këtyre bisedimeve është përqendruar te fusha e infrastrukturës, rrjeti i transportit dhe zhvillimi i qëndrueshëm urban. Këto zhvillime janë bërë të ditura nga ambasadori i Kosovës në Francë, Lulzim Hiseni, i cili së bashku me ministrin e Sportit dhe Rinisë, Blerim Gashani, kanë mbajtur një takim zyrtar me Gérard Wolf, të dërguarin e posaçëm të shtetit francez për qytetet e qëndrueshme dhe transportin. Në këtë takim ka marrë pjesë edhe Barbara Petri-Uy, në cilësinë e këshilltares së ministrit. “Lojërat Mesdhetare Prishtina 2030: forcimi i bashkëpunimit Kosovë–Francë për një trashëgimi të qëndrueshme Së bashku me Blerim Gashanin, ministër i Sportit dhe Rinisë i Kosovës, zhvilluam një takim me Gérard Wolf, të dërguarin e posaçëm të Francës për qytetet e qëndrueshme dhe transportin, në prani të Barbara Petri-Uy, këshilltare e ministrit. Diskutimet u përqendruan në përgatitjet për Lojërat Mesdhetare Prishtina 2030, veçanërisht në mundësitë për të shfrytëzuar ekspertizën franceze në fushën e infrastrukturës, mobilitetit dhe zhvillimit të qëndrueshëm urban”, ka shkruar Hiseni në rrjetet sociale. Ai ka shtuar gjithashtu se ky takim ka shërbyer si një mundësi e shkëlqyer për të identifikuar fusha konkrete të bashkëpunimit, duke i dhënë një impuls të ri marrëdhënieve dhe partneritetit strategjik ndërmjet dy vendeve në kuadër të këtij eventi të madh sportiv.