Samir Handanoviq flet hapur para derbit: Ja çfarë tha për portierët e Interit dhe liderin Lautaro Martínez

Ish-portieri i njohur i Interit, Samir Handanoviq, ka ndarë mendimet e tij rreth situatës së portierëve në prag të derbit të madh të Milanos, duke u ndalur te forma e Mike Maignan dhe sfidat e fillimit që po kalon Josep Martínez. “Maignan është një garanci e sigurt, ndërsa Pepo ka gjithçka për të dëshmuar. Ai po mban mbi supe një trashëgimi tejet të rëndë. Për një portier, çdo lëshim analizohet në detaj, dhe ajo që bën diferencën e vërtetë është karakteri,” u shpreh fillimisht Handanoviq në një intervistë për “La Repubblica”. Duke folur për rotacionin në portë, ai shtoi: “Është një qasje e shëndetshme. Chivu i ka menaxhuar gjërat në mënyrë të shkëlqyer, me shumë ndjeshmëri, duke i dhënë besim Martínezit në momentet e ndërlikuara dhe duke i dhënë hapësirën e duhur Provedelit kur ka qenë koha”. Duke iu përgjigjur pyetjes se çfarë lloj kapiteni është Lautaro Martínez, ish-gardiani zikaltër u tregua i prerë: “Këtë gjë mund ta vlerësojnë vetëm shokët e tij të skuadrës, gjithçka tjetër mbeten thjesht fjalë”. Duke evokuar përvojën e tij me shiritin, ai shpjegoi: “Shiriti i kapitenit nuk e ndryshon njeriun në thelb, por të ngarkon me përgjegjësi shtesë. Ai të konsumon energji jashtë fushës. Duhet të shërbesh si shembull në çdo aspekt: te paraqitjet, në seancat stërvitore, te sjellja, e madje edhe te mënyra e veshjes. Duhet të jesh i drejtë me grupin dhe të shërbesh si urë lidhëse mes lojtarëve, trajnerit dhe klubit”. Në fund, i pyetur nëse do të jetë i pranishëm sonte në stadiumin “San Siro”, Handanoviq u përgjigj me sinqeritet: “Nuk besoj. Preferoj ta ndjek dhe ta përjetoj më mirë para televizorit, ndonëse emocionet në shkallët e stadiumit janë krejtësisht të tjera. Isha në tribunë gjatë gjysmëfinales së Champions-it kundër Barcelonës, por u largova përpara se të mbyllej ndeshja. Sa shumë gjëra humba…”.