Tensioni në prag të tubimit, Tirana merr masa të rrepta: Mbi 2 mijë policë zbarkojnë në terren përreth Kryeministrisë

Kryeqyteti është vënë nën masa të rrepta sigurie në prag të nisjes së protestës së paralajmëruar, ku bashkohen studentët, simpatizantët e tyre dhe përfaqësues të Partisë Demokratike. Për mbarëvajtjen e rendit dhe qetësisë publike, Policia e Shtetit ka angazhuar mbi 2 mijë efektivë, ndërkohë që perimetri përreth godinës së Kryeministrisë është rrethuar tërësisht nga kordonë të dendur policorë. Në gatishmëri operacionale janë vendosur edhe autobotët e pajisur me ujë për shpërndarjen e turmës, së bashku me repartet e Ndërhyrjes së Shpejtë të pajisura me pajisje mbrojtëse dhe speciale. Strategjia e sigurisë përfshin gjithashtu angazhimin e forcave speciale "Shqiponja", FNSH-së, shërbimeve të komisariateve të kryeqytetit, agjentëve të infiltruar civilë, si dhe përdorimin e dronëve për vëzhgimin e tubimit nga ajri në kohë reale. Kjo protestë po zhvillohet nën zbatimin e aktit të ri normativ për tubimet, i cili i jep autoriteteve policore kompetenca të zgjeruara dhe vendos gjoba e sanksione administrative për çdo person që shkel rregullat e sigurisë.