Kërcënimet me jetë ndaj vëllezërve Haradinaj, AAK i drejtohet zyrtarisht Policisë së Kosovës

Aleanca për Ardhmërinë e Kosovës ka ndërmarrë hapa ligjorë duke denoncuar në organet e rendit mesazhet kërcënuese me vrasje që janë drejtuar ndaj deputetit Ramush Haradinaj dhe anëtarit të partisë, Daut Haradinaj, të cilat janë shpërndarë përmes llogarive anonime në rrjetin social Facebook. Kushtrim Xhemaili, zëdhënës i kësaj partie, ka bërë të ditur se një numër i madh profilesh të rreme janë angazhuar në përhapjen e të pavërtetave dhe shpifjeve, duke theksuar se kjo fushatë tashmë ka kaluar në faza të rrezikshme me kërcënime të hapura për jetën. Ai ka veçuar rastin e një profili të quajtur “Besmir Kelmendi”, i cili duke përdorur imazhin e Avni Rrustemit dhe pseudonimin “Avni Rrustemi 2.0”, gjatë 48 orëve të fundit ka bërë thirrje publike për eliminimin fizik të Ramush dhe Daut Haradinajt. “Ky profil po tenton të ndërlidhë qëllimisht emrin e familjes Haradinaj me rastin tragjik në Pejë, duke përdorur citate dhe pretendime të rreme të personave të përfshirë në atë ngjarje, me qëllim nxitjen e vetëgjyqësisë dhe akteve vëllavrasëse”, ka deklaruar Xhemaili. Sipas tij, struktura e AAK-së i ka dorëzuar tashmë Policisë së Kosovës dhe institucioneve kompetente të drejtësisë të gjitha provat dhe materialet e mbledhura lidhur me këto llogari. “Ne do të ndjekim rrugën ligjore deri në fund për secilin individ që fshihet pas këtyre profileve dhe që prodhon apo shpërndan mesazhe të tilla terrorizuese”, ka thënë ai. Në fjalën e tij, Xhemaili ka hedhur akuza edhe ndaj disa ligjvënësve nga radhët e mazhorancës, duke aluduar se qëndrimet e tyre po u japin krah fushatave kërcënuese në hapësirën digjitale. Ai ka vlerësuar se e gjithë kjo paraqet një skenar për të hequr fokusin e publikut nga dështimi institucional për të parandaluar ngjarjen e rëndë tragjike në qytetin e Pejës. “Tragjeditë njerëzore nuk mund dhe nuk do të lejohen të keqpërdoren për luftë politike e as për nxitje të dhunës. Autorët e këtyre kërcënimeve dhe nxitësit e tyre politikë shumë shpejt do të përballen me forcën e ligjit dhe të drejtësisë”, ka përfunduar Xhemaili.