Tifozi i njohur i Kombëtares thirrje prekëse nga spitali: Po kaloj një sprovë të vështirë me shikimin

Erjon Vishkulli, i njohur gjerësisht si tifozi i flaktë i Kombëtares shqiptare, i cili mbeti i lënduar rëndë në sy gjatë valës së protestave studentore, po kalon një tjetër moment kritik në jetën e tij. Pas një ndërhyrjeje kirurgjikale të kryer në Itali, ai po lufton sërish për të ruajtur shikimin, ndërkohë që në vend vijojnë protestat e studentëve që kërkojnë largimin e kryeministrit Edi Rama. Përmes një postimi në rrjetet sociale, Vishkulli ka bërë një reagim ku shpreh mirënjohjen e thellë për mbështetjen e madhe që ka marrë gjatë kësaj periudhe të errët. “Në këto momente të vështira të jetës sime, ku pas një dhimbjeje të madhe po përballem edhe me një sfidë tjetër të rëndësishme për shikimin e syrit, dua të shpreh mirënjohjen time më të sinqertë për të gjithë”, ka shkruar ai ndër të tjera. Ai ka veçuar falënderimet për miqtë, familjarët dhe bashkatdhetarët anë e mbanë botës, të cilët i kanë ofruar kurajë përmes mesazheve, thirrjeve telefonike dhe urimeve të përzemërta. “Në një moment kur zemra ka nevojë për mbështetje, ju më treguat se nuk jam vetëm. Solidariteti, dashuria dhe respekti që më keni dhuruar kanë një vlerë të jashtëzakonshme për mua”, vijon mesazhi i tij. Tifozi kuqezi ka theksuar se kjo mbështetje dëshmon unitetin dhe shpirtin solidar të shqiptarëve, të cilët bashkohen si në gëzime ashtu edhe në orët më të këqija. “Dhe mbi të gjitha, falënderoj Zotin për forcën, për jetën dhe për shpresën që më jep çdo ditë. Lutem që kjo sfidë të kalojë me sukses dhe që të gjithë të kemi shëndet e bekime”, ka përfunduar Vishkulli, duke përcjellë urimin që Zoti t'ua shpërblejë dashurinë të gjithëve dhe duke mbyllur me thirrjen: “Mirënjohje pafund, U shtofshin Shqiptarët e mirë”.