Katalanasit synojnë sërish mbrojtësin e Interit, Alessandro Bastoni në radarët e Barcelonës

Klubi i Barcelonës ka shfaqur sërish interesim të shtuar për shërbimet e mbrojtësit të Interit, Alessandro Bastoni, duke e kthyer atë në një nga objektivat kryesorë për merkaton e ardhshme. Sipas burimeve nga media spanjolle, drejtuesit e gjigantit katalanas po mendojnë të hedhin një hap konkret që në afatin kalimtar të muajit janar, pasi tentativa e bërë gjatë vitit të kaluar nuk solli rezultatin e dëshiruar. Në kuadër të planit për të forcuar prapavijën, drejtori sportiv i Barcelonës, Deco, është vënë në kërkim të profileve të larta. Bastoni ka kohë që pëlqehet në kampin katalanas dhe, pavarësisht se luan me sukses te zikaltrit, flitet se ai do të ishte i hapur për të shqyrtuar një propozim zyrtar nga një skuadër e madhe si Barcelona. Megjithatë, situata te klubi italian mbetet komplekse, pasi drejtuesit e Interit e kanë cilësuar gjithmonë qendërmbrojtësin italian si një element të patjetërsueshëm të formacionit. Duke qenë se ai ka një rol vendimtar në Milano, shkëputja e tij gjatë merkatos së dimrit duket një sfidë e vështirë për t'u arritur. Për ta bindur klubin nga Serie A dhe vetë futbollistin, Barcelona do të duhet të paraqesë një paketë financiare tejet joshëse. Vlen të theksohet se Alessandro Bastoni është i lidhur me një kontratë të vlefshme me zikaltrit deri më 30 qershor 2028.