Skandali i basteve te “Ballon d’Or 2026”: Nisin hetimet zyrtare për manipulim të mundshëm të votave

Organizatorët e prestigjiozit “France Football” kanë ndërmarrë hapa urgjentë duke hapur një hetim të mirëfilltë lidhur me lëvizjet e dyshimta të basteve gjatë edicionit të “Ballon d’Or 2026”. Shkak për këtë vendim janë bërë shqetësimet e ngritura se fituesit dhe renditja përfundimtare mund të jenë dekonspiruar para ceremonisë zyrtare të ndarjes së çmimeve. Sipas të dhënave të bëra publike, bëhet fjalë për një total prej 12 llogarish në platformën e parashikimeve “Polymarket”, të cilat kanë investuar një shumë prej mbi 264 mijë dollarësh. Këto profile kanë arritur të arkëtojnë afro 200 mijë dollarë fitim, pasi kanë gjetur me saktësi absolute pesë pozicionet e para të renditjes zyrtare të futbollistëve më të mirë. Lista e parashikuar me saktësi kirurgjikale nga këto llogari nxirrte në krye sulmuesin Harry Kane, i ndjekur nga Kylian Mbappé në vendin e dytë, Lamine Yamal në të tretin, mesfushori Rodri në të katërtin dhe legjenda Lionel Messi në pozicionin e pestë. Alarmi është ngritur jo vetëm për shkak të saktësisë së habitshme, por edhe prej modeleve të çuditshme të përdorimit të këtyre profileve. Konkretisht, shtatë prej llogarive nuk kishin kryer asnjë aktivitet të mëparshëm në tregjet e tjera të basteve, ndërsa gjashtë prej tyre kishin vendosur bastin e tyre të parë vetëm një çerek ore pas hapjes së llogarisë. Këto elemente kanë forcuar hipotezën se të dhëna të rezervuara dhe konfidenciale që lidhen me procesin e votimit mund të kenë rrjedhur para se të shpalleshin publikisht në skenë. Megjithatë, autoritetet sqarojnë se deri në këtë fazë të procesit nuk ekzistojnë prova përfundimtare që konfirmojnë zyrtarisht një rrjedhje të informacioneve nga brenda institucionit. Për t'i shkuar çështjes deri në fund, “France Football” ka vënë në lëvizje edhe autoritetet e policisë franceze. Hetimet vijojnë intensivisht për të identifikuar personat që fshihen pas këtyre llogarive dhe për të verifikuar nëse është shfrytëzuar ndonjë burim i brendshëm për përfitime personale financiare.