Tragjedi në Kaliforni: Të shtëna me armë zjarri brenda një qendre tregtare, një i vdekur dhe gjashtë të plagosur

Një sulm i armatosur ka tronditur mbrëmjen e djeshme një qendër tregtare në shtetin e Kalifornisë, duke lënë të vdekur një person dhe duke plagosur gjashtë të tjerë, tre prej të cilëve po luftojnë për jetën në spital. Incidenti i rëndë ka ndodhur rreth orës 20:30 brenda dyqanit "Spirit Halloween", i vendosur në qendrën tregtare Solano Town Center në qytetin e Fairfieldit. Detajet paraprake janë bërë të ditura nga shefi i policisë vendase, Dan Marshall, i cili konfirmoi se viktima ka ndërruar jetë në vendin e ngjarjes, ndërsa të plagosurit janë transportuar urgjentisht në spitalet përreth. Autoritetet policore ende nuk kanë bërë publike identitetet apo moshat e viktimave të kësaj tragjedie. Gjithashtu, deri më tani mbetet e paqartë dinamika e plotë, numri i saktë i autorëve që fshihen pas këtij sulmi, si dhe motivet që çuan në këtë akt dhune. Në momentin e shpërthimit të të shtënave, ambienti i dyqanit ka qenë tejet i mbingarkuar me blerës, të cilët kishin dyqanet e mbushura për të siguruar kostume, dekorime dhe artikuj të ndryshëm për festën e Halloween-it. Njëri nga dëshmitarët tregoi se bashkëshortja e tij, e cila ndodhej brenda në dyqan gjatë incidentit, ka dëgjuar afërsisht shtatë të shtëna armësh, pas të cilave ka parë skena paniku me njerëz që vraponin, bërtitnin dhe qanin të tmerruar. Ndërkohë, një tjetër dëshmitar ndau dëshminë e një punonjëseje të dyqanit "Spirit Halloween", e cila kishte arritur të largohej me vrap për në një restorant pranë për t'i shpëtuar rrezikut. "Isha te 'Chipotle' kur një vajzë që punonte te 'Spirit' hyri brenda dhe tregoi se kishin hyrë persona që kishin nisur të qëllonin," ka rrëfyer dëshmitari për ngjarjen e rëndë.