Zbulimi i madh i talentit të Real Madridit: Idhulli im është Cristiano Ronaldo

Sulmuesi anësor i Real Madridit, Yan Diomande, ka treguar hapur se Cristiano Ronaldo mbetet zgjedhja e tij e parë, nëse do të kishte shansin të ndante fushën me ndonjë nga legjendat e lavdishme të skuadrës madrilene. Gjatë një interviste ku u pyet se cilën nga figurat më ikonike të klubit do të dëshironte të kishte bashkëlojtar në formacionin aktual, talenti 19-vjeçar nuk ngurroi të shprehte haptazi admirimin e tij. “Pa dyshim, Cristiano Ronaldo, idhulli im. 100%”, u shpreh prerazi Diomande. Siç dihet, sulmuesi portugez shkroi historinë te Real Madridi gjatë periudhës 2009-2018, duke u shndërruar në golashënuesin më produktiv në histori të klubit me gjithsej 450 realizime. Gjatë atij cikli të jashtëzakonshëm në futbollin spanjoll, ylli portugez udhëhoqi skuadrën drejt fitimit të katër trofeve të Ligës së Kampionëve dhe dy titujve të kampionatit, La Liga. Ndërkohë, sa i takket paraqitjeve të tij personale, Diomande ka regjistruar 13 paraqitje me fanellën e Real Madridit që prej transferimit të tij gjatë merkatos së verës, duke lënë gjurmë me 3 gola dhe 4 asistime për skuadrën.