Ndërtimi i arsimit të së ardhmes: Ministri Çeku takon prindërit në Pejë dhe Gjakovë për Strategjinë 2035+

Ministri i Arsimit dhe Shkencës, Hajrulla Çeku, ka vijuar ciklin e bashkëbisedimeve me qytetarët, duke zhvilluar takime të rëndësishme me prindërit në qytetet e Pejës dhe Gjakovës, në kuadër të procesit për hartimin e Strategjisë së Arsimit 2035+. Këto takime, të organizuara në bashkëpunim të ngushtë me Këshillin e Prindërve të Kosovës, synojnë integrimin e zërit dhe ideve të prindërve gjatë përcaktimit të objektivave dhe prioriteteve kryesore për të ardhmen e sistemit arsimor në vend, bëhet e ditur përmes një njoftimi zyrtar. Gjatë bashkëbisedimit të zhvilluar në Gjakovë, ministri Çeku i shoqëruar nga kryetari i Këshillit të Prindërve të Kosovës, Besnik Dragusha, ka bashkëbiseduar hapur me prindërit rreth sfidave, nevojave dhe pritshmërive të tyre për zhvillimin e mëtutjeshëm të arsimit. Në fjalën e tij, ministri vuri theksin te domosdoshmëria e përfshirjes aktive të prindërve, duke garantuar se dokumenti strategjik do të jetë reflektim i kërkesave reale të nxënësve dhe gjithë komunitetit arsimor. Edhe kryetari Dragusha ka vlerësuar lart angazhimin dhe pjesëmarrjen e prindërve në këtë nismë vendimtare. Krejt në kuadër të kësaj vizite në Gjakovë, ministri Çeku, i shoqëruar nga zëvendësministri i Arsimit, Muhedin Nushi, kanë inspektuar punimet në shkollën e re të fshatit Ponoshec – një investim i ndërmarrë nga dikasteri që ai drejton, e cila shumë shpejti do t'i dyert për nxënësit. Po ashtu, ata kanë vizituar edhe Bibliotekën “Ibrahim Rugova”. Ndërkaq, gjatë takimit të mbajtur me prindërit në qytetin e Pejës, Çeku ka shprehur mirënjohjen e tij për interesimin e lartë dhe gatishmërinë e treguar për të kontribuar në debatin mbi modelin e shkollës që dëshirojnë për fëmijët e tyre. Në të dyja qytetet, prindërit kanë shfrytëzuar rastin për të shkëmbyer përvojat e tyre, për të ngritur shqetësimet aktuale dhe për të ndarë vizionin e tyre për horizontin e arsimit, përfundon njoftimi i ministrisë.