Formë e shkëlqyer, Nevil Dede shpallet trajneri i muajit tetor në Superiore

Pjesë e vlerësimeve zyrtare të muajit nga Drejtoria Teknike e FSHF-së, Nevil Dede është kurorëzuar si trajneri më i mirë i muajit tetor në “Abissnet Superiore”. Kryetari i stolin rrogozhinas kaloi një periudhë tejet të suksesshme me Egnatian, duke regjistruar tri fitore radhazi ndaj Laçit, Vllaznisë dhe Teutës. Këto paraqitje pozitive i sollën skuadrës 9 pikë të plota, duke e katapultuar në krye të klasifikimit me kuotën e 21 pikëve pas nëntë javëve të para të kampionatit. Ceremonia e dorëzimit të këtij trofeu u realizua nga trajneri i Kombëtares U-19, Fatjon Tafaj, i cili i dorëzoi çmimin teknikut Dede. Menjëherë pas marrjes së këtij vlerësimi, trajneri i Egnatias tregohet mirënjohës, duke theksuar se ky sukses i dedikohet mbi të gjitha lojtarëve dhe strukturave të klubit për mbështetjen e vazhdueshme. Duke analizuar ecurinë e përgjithshme, Dede vuri në dukje nivelin e lartë dhe rivalitetin e ashpër të këtij edicioni, duke paralajmëruar një garë të hapur e të luftuar fort deri në fund të kampionatit. Gjatë prononcimit të tij, ai nuk la pa përmendur as rrugëtimin europian të Egnatias në UEFA Conference League, duke shprehur krenari për mënyrën se thejsht dhe dinjitozisht skuadra po përballet me kundërshtarët ndërkombëtarë. “Kampionati është shumë i luftuar dhe shumë i fortë sivjet. Me shumë vështirësi arritëm të kthehemi aty ku ne pretendojmë që na takon. Mos të harrojmë që kemi edhe kundërshtarë të fortë, si Teuta, Dinamo, por edhe të tjerët që nuk janë “ndezur” akoma. Besoj që “Abissnet Superiore” do të jetë një kampionat i luftuar dhe tifozët sivjet do të shijojnë një futboll të bukur dhe të kënaqshëm për nivelin tonë. Është nder dhe jam shumë mirënjohës për vlerësimin që marr si trajneri i muajit. Mirënjohje për futbollistët tanë, për përkushtimin dhe punën e palodhur çdo ditë, si në ndeshje, ashtu edhe në stërvitje, që bëjnë të mundur që ne të jemi këtu ku po shkojmë dhe po ecim. Merita është vetëm e atyre. Gjithashtu, vlerësim maksimal për klubin Egnatia, për mbështetjen që japin dhe për bashkëpunimin e frytshëm që po bëjmë. Shpresojmë që të jemi në këtë ritëm dhe pozitivitet, jo vetëm rezultatesh, por sidomos të lojës dhe të mundohemi të mos na ndodhin dëmtime si ai i Sotës dje, për të cilin me keqardhje uroj shërim sa më të shpejtë. Të jem i sinqertë, bashkë me djemtë po e shijojmë këtë moment. Besoj që edhe shqiptarët, kush e do futbollin, po e shijojnë. Në momentin e parë arritëm atë objektiv që kishim, pra grupet e Conference League. Tani po marrim pikë, por përpos pikëve, ajo që mua më kënaq është që ne luajmë futboll përballë çdo kundërshtari, në çdo stadium të Europës ku ne shkojmë. Unë jam shumë krenar për djemtë dhe për futbollin që ata po mundohen të bëjnë bashkë me mua. Shpresojmë që të vazhdojmë të përmirësohemi çdo ditë. Motoja jonë është: versioni ynë më i mirë, çdo ditë dhe çdo ndeshje”, u shpreh Dede.