Pasurohet fondi i peshkut në Mavrovë: 400 kg peshq të rinj lëshohen në liqen, hyn në fuqi ndalesa e krapit

Ekosistemi ujor i Liqenit të Mavrovës dhe rrjedhave përreth në kuadër të Parkut Kombëtar „Mavrova” është pasuruar me sasi të reja peshqish, si pjesë e nismave për mbrojtjen e faunës. Në zbatim të Planit Vjetor për ripopullimin e ujërave, në këtë zonë janë hedhur gjithsej 400 kilogramë peshq, të ndarë në 200 kilogramë troftë dhe 200 kilogramë krap. Autoritetet e Parkut Kombëtar „Mavrova” theksojnë se ky hap vjen në kuadër të përpjekjeve të vazhdueshme për të mirëmbajtur dhe pasuruar fondin e peshkut, duke garantuar njëkohësisht ruajtjen e ekuilibrit të natyrës në këtë rajon. „Mbrojtja e ujërave dhe e fondit të peshkut është përgjegjësi e përbashkët. Duke respektuar rregullat dhe duke u sjellë me përgjegjësi, kontribuojmë në ruajtjen e pasurisë natyrore të parkut”, theksohet në njoftimin zyrtar të NP „Mavrova”. Krahas këtij aksioni, duke filluar nga nesër, do të nisë zbati i një ndalese dymujore për peshkimin e llojit krap (Cyprinus carpio) përgjatë zonës rekreative të Liqenit të Mavrovës. Ky vendim është miratuar nga ministri resort __[përkatës]__ me kërkesë të drejtorisë së parkut dhe do të mbetet i vlefshëm deri më 31 dhjetor 2026. Sipas drejtuesve të Parkut Kombëtar „Mavrova”, ky kufizim synon t'i sigurojë fondit të ri të peshqve kushtet e nevojshme për përshtatje, përhapje dhe rritje të suksesshme në ambientin e tyre natyror, duke i dhënë një impuls të rëndësishëm ripërtëritjes së pasurisë ujore.